Հայաստանի արտաքին գործերու նախարարի տեղակալ Վահան Կոստանեան ՙBBC՚-ին հետ հարցազրոյցի մը մէջ անդրադարձաւ Պաքուի հետ կարգաւորումի հոլովոյթին եւ տարածաշրջանային զարգացոււմներուն: Դիտել տալով, որ Պաքու կը յայտարարէ խաղաղութեան պայմանագիր կնքելու մտադրութեան մասին, Կոստանեան ընդգծեց, որ խօսքերը բաւարար չեն, այլ Ատրպէյճան պէտք է դիմէ նաեւ գործի: ՙՊաքու դժկամութիւն կը ցուցաբերէ խաղաղութեան պայմանագիրը վերջնականացնելու հարցին մէջ՚, ահազանգեց Կոստանեան, միաժամանակ Երեւանի յանձնառութիւնը յայտնելով խաղաղութիւն հաստատելու ջանքերուն: ՙԱտրպէյճան պէտք է ճանչնայ Հայաստանի տարածքային ամբողջականութիւնը եւ այդ հարցով անորոշութիւն պէտք չէ ըլլայ՚, յստակացուց նախարարի տեղակալը:
Միւս կողմէ, Ատրպէյճանի նախագահի աշխատակազմէն Հիքմէթ Հաճիեւ Ուաշինկթընին կոչ ուղղեց փոխելու Պաքուի նկատմամբ իր դիրքորոշումը, որպէսզի կարենայ միջնորդի դեր խաղալ Երեւանի ու Պաքուի միջեւ: Հաճիեւի համաձայն, ամերիկեան գոնկրէսը անարդար յայտարարութիւն հրապարակած է Ատրպէյճանի նկատմամբ, որ պէտք է ուղղել, որպէսզի Ուաշինկթըն միջնորդ դառնայ Երեւանի հետ Պաքուի բանակցութիւններուն ընթացքին:
