Մինչ Կազայի մէջ զէնքերը չեն լռած, այլ բախումներն ու ռմբակոծութիւնը նոյն ուժգնութեամբ կը շարունակուինª խլելով յաւելեալ կեանքեր եւ պատճառելով նիւթական ահաւոր վնաս, երէկ շշուկներ տարածուեցան հաւանական զինադադարի վերաբերեալ նախնական քննարկումներու մասին: Իսրայէլեան լրատուամիջոցներ երէկ հաղորդեցին, որ ապահովական կառավարութիւնը կը քննարկէ երկարատեւ զինադադար յայտարարելու հնարաւորութիւնըª որպէսզի Համաս առիթ ունենայ մէկտեղելու բոլոր գերիները: Բանակցային առումով կ’աշխուժանայ մանաւանդ Գահիրէն, որ կը հիւրընկալէ պաղեստինեան ուժերու ներկայացուցիչներըª բիւրեղացնելու համար զինադադարի առաջարկներն ու պայմանները: Համասի քաղաքական գրասենեակի նախագահ Իսմայէլ Հանիա երէկ հասաւ Գահիրէª ՙեգիպտացիներուն հետ քննարկելու Կազայի դրութիւնը, պատերազմի զարգացումները, իսրայէլեան ոճիրները եւ շարք մը այլ թղթածրարներ՚, ինչպէս նշուեցաւ շարժումին հրապարակած հաղորդագրութեան մէջ: Միաժամանակ յայտարարուեցաւ, որ Եգիպտոս պիտի մեկնի նաեւ Ժիհատ շարժումէն պատուիրակութիւն մըª Կազայի պատերազմին վերջ տալու եւ գերիներու փոխանակումին պայմանները քննարկելու համար:
Զինադադարի սպասումով, սակայն, իսրայէլեան ծանր յարձակումները շարունակուեցան Կազայի զանազան շրջաններու մէջ, մինչ իսրայէլացի պաշտօնատարներ նշեցին, որ պիտի թիրախաւորեն Կազայի նորանոր շրջաններ:
Արաբական լրատուամիջոցներ հաղորդեցին, որ իսրայէլեան ուժերը Կազայի հարաւային Ռաֆահ շրջանին մէջ ռմբակոծած են մզկիթ մը, որ կը գտնուի քուէյթեան հիւանդանոցին մերձակայքըª պատճառելով վիրաւորներ եւ ծանր վնասներ: Հաղորդուեցաւ նաեւ, որ շուրջ 70 զոհի մարմին գտնուած է Կազա քաղաքի Թելեթինի շրջանէնª իսրայէլեան ուժերու նահանջէն ետք:
Իսրայէլեան բանակը յայտարարեց, որ Կազայի մէջ ընթացող մարտերուն ընթացքին մահացած է ՙՂաֆաաթի՚ գումարտակի բարձրաստիճան սպաներէն մէկը:
