Եւրոմիութեան 27 երկիրներու արտաքին գործերու նախարարները Պրիւքսէլի մէջ համաժողով ունեցած են Արեւելեան գործընկերութեան անդամ երկիրներու, այդ շարքինª Հայաստանի արտաքին գործերու նախարարին հետ£ Դատարկ էր միայն Պելառուսիոյ աթոռը, որու նախագահին դէմ միութիւնը պատժամիջոցներ սահմանած է£ Փոխարէնը յատուկ վերաբերմունք եղած է Հայաստանի հանդէպ£
Եւրոմիութեան արտաքին յարաբերութիւններու հարցով բարձրագոյն յանձնակատարը առանձինª ոչ-պաշտօնական նախաճաշ-հանդիպում ունեցած է Արարատ Միրզոյեանի հետ£
ՙԱյսօրուան առաջին հանդիպումս Հայաստանի արտաքին գործերու նախարարին հետ է£ Քանի որ այդ տարածաշրջանին մէջ շատ բան կը փոխուի, եւ շատ կարեւոր է ուշադրութեան կեդրոնին պահել, մասնաւորապէս, Հայաստանը, որ շատ բարդ իրավիճակի մէջ էր եւ կը շարունակէ ըլլալ£ Ուստի, ես իմ օրը կը սկսեմ Հայաստանի արտաքին գործերու նախարարին հետ՚, հանդիպման մեկնարկին ըսած է Ժոզեփ Պորէլը:
Աւելի վաղ Եւրոմիութեան բարձրաստիճան դիւանագէտներէն մէկը ըսած էր, որ Պրիւքսէլը կ’ուզէ մանրամասնութիւններ լսել Միրզոյեանէնª տարածաշրջանին մէջ տեղի ունեցած վերջին զարգացումներուն, Ատրպէյճանի հետ անցեալ շաբաթ ձեռք բերուած պայմանաւորուածութիւններուն վերաբերեալ եւ ճշդածª ինչով կրնայ օգնել£
ՙՄենք պատրաստ ենք թէ՛ ֆինանսական, թէ՛ քաղաքական օգնութիւն տրամադրելու՚, ըսած էր եւրոպացի բարձրաստիճան դիւանագէտը, յաւելելովª կ’ակնկալեն Հայաստանի արտաքին գործերու նախարարէն լսելª որոնք են առաջնահերթութիւնները£ ՙԻնծի համար պատիւ է եւ լաւ առիթª ներկայացնելու մերօրեայ Հայաստանը, մեր առջեւ ծառացած մարտահրաւէրները, ինչպէս նաեւ մեր հնարաւորութիւններն ու ձգտումները: Սա շատ լաւ հնարաւորութիւն է ներկայացնելու մեր պատկերացումները Եւրոմիութեան հետ մեր յարաբերութիւնները խորացնելու, Հայաստանի եւ Եւրոմիութեան միջեւ իրականացուած աշխատանքներու, ինչպէս նաեւ ընելիքներուն վերաբերեալ՚, ըսաւ Միրզոյեան£
Պաշտօնական Երեւանը վերջին ամիսներուն շարունակաբար կ’ընդգծէ, որ պատրաստ է եւ հաստատակամ խորացնելու յարաբերութիւնները Պրիւքսէլի հետ£ Այդ մասին նաեւ Վարչապետ Փաշինեան յայտնեց Եւրոխորհրդարանին մէջ երկու ամիս առաջ:
