Հայաստանի մէջ ծնած` քաղաքացիութիւն չունեցող անձերու երեխաները Հայաստանի Հանրապետութեան քաղաքացիութիւն ձեռք բերելու իրաւունք պիտի ստանան` առանց դիմումի:
ՙՀայաստանի Հանրապետութեան քաղաքացիութեան մասին՚ օրէնքին մէջ լրացումներ եւ փոփոխութիւն կատարելու մասին օրէնքի նախագիծը Ազգային ժողովի Պաշտպանութեան եւ անվտանգութեան հարցերու մշտական յանձնաժողովի նիստին ներկայացուց Ներքին գործերու նախարարութեան Գաղթի եւ քաղաքացիութեան ծառայութեան պետ Արմէն Ղազարեանը:
Նախագիծի առաջարկներէն մէկը քաղաքացիութիւն չունեցող անձերու եւ ապաքաղաքացիութեան դէմ պայքարի տրամաբանութեան մէջ է: Այս պահին կը քննարկուի Քաղաքացիութիւն չունեցող անձերու մասին առանձին օրէնքի ներկայացումը: Մինչեւ այդ կառավարութիւնը ներկայացուած նախագծով առաջարկ ըրած է:
ՙՔաղաքացիութիւն չունեցող անձերու երեխաներու հետ կապուած դրոյթ ունինք, որ անոնց մեխանիկօրէն կու տանք ՀՀ քաղաքացիութիւն: Կայ դիմումի պահ, կ՛առաջարկենք դիմումի պահանջը հանել, որ օրէնքի ուժով այդ երեխաները ճանչնանք ՀՀ քաղաքացի եւ անով նաեւ կատարենք 1954 թուականի ապաքաղաքացիութեան դէմ պայքարի պայմանադրութեամբ մեր ստանձնած պարտաւորութիւնները՚, ըսաւ Ղազարեան:
Նախագծով նաեւ յստակացում կը կատարուի օրէնքին մէջ, որ ծնողներէն մէկուն քաղաքացիութեան դադարեցման պարագային միայն կրնայ անչափահասի քաղաքացիութեան դադարեցման վարոյթ մեկնարկել:
ՙՔաղաքացիական պայմանագիր՚ խմբակցութեան պատգամաւոր Հայկ Սարգսեան հետաքրքրուեցաւ, թէ այն դէպքերու մասով, երբ անձեր մինչեւ զինուորական հաշուառումը կը հրաժարին ՀՀ քաղաքացիութենէն, ի՞նչ աշխատանք կը տարուի: Ղազարեան պատասխանեց, որ այդ հարցը իրենց ուշադրութեան կեդրոնին է, այս առաջարկն ալ միտուած է պատգամաւորի մատնանշած խնդիրի լուծման:
Նախագիծը հաւանութիւն ստացաւ եւ դրական եզրակացութեամբ պիտի ընդգրկուի Ազգային ժողովի լիագումար նիստերու օրակարգ:
