Երեւանի քաղաքապետարանը Եւրոպական ներդրումային դրամատանի հետ տարբեր ծրագրեր կ՛իրականացնէ քաղաքային տնտեսութեան շարք մը ոլորտներու մէջ:
Երեւանի քաղաքապետարանէն յայտնած են, որ Տիգրան Աւինեանը երկու կառոյցներու համագործակցութեան ընդլայնման հետ կապուած հարցեր քննարկած է դրամատան ընդլայնման եւ հարեւանութեան վարչութեան տնօրէն Լիոնէլ Ռապայիի գլխաւորած պատուիրակութեան հետ հանդիպման ժամանակ:
Եւրոպական ներդրումային դրամատան աջակցութեամբ` Երեւանի ուժանիւթի արդիւնաւէտութեան ծրագրի շրջանակին մէջ, մայրաքաղաքին մէջ կ՛իրականացուին մանկապարտէզներու հիմնանորոգման աշխատանքներ, դարմանատուները եւս ընդգրկուած են ծրագրին մէջ: Երեւանի կոշտ թափօններու կառավարման ծրագրի շրջանակին մէջ ալ կը նախատեսուի Նուպարաշէնի աղբավայրին յարակից տարածքին մէջ կառուցել նոր աղբավայր:
Կարեւորելով գործակցութեան ընդլայնումը` Երեւանի քաղաքապետ Տիգրան Աւինեանը ներկայացուցած է մայրաքաղաքին մէջ նախաձեռնուած ու դիտարկուող այն նախագիծերը, որոնք լուրջ դերակատարում պիտի ունենան բնակիչներու կեանքի որակի բարձրացման վրայ եւ կրնան հետաքրքրել դրամատունը:
Եւրոպական ներդրումային դրամատան ընդլայնման եւ հարեւանութեան վարչութեան տնօրէն Լիոնէլ Ռապային իր հերթին նշած է, որ Երեւան քաղաքը կարեւոր գործընկեր է դրամատան համար եւ համոզմունք յայտնած է, որ համատեղ ծրագրերը պիտի կրեն շարունակական բնոյթ:
