Միջազգային մեկնաբանութիւններուն մէջ, Առողջապահութեան համաշխարհային կազմակերպութիւնը խստիւ դատապարտեց Կազայի հիւանդանոցներուն մէջ տեղի ունեցած կոտորածը: Գանատայի վարչապետ Ճասթին Թրուտօ շեշտեց, որ ՙԿազայի մէջ իսրայէլացիներուն ձեռամբ երեխաներու սպանութիւնը պէտք է վերջ գտնէ՚: Նոյնիսկ ամերիկեան Սպիտակ տունը անուղղակիօրէն մեկնաբանեց իսրայէլեան գործողութիւնները եւ շեշտեց, որ ՙպէտք է պաշտպանել հիւանդանոցներն ու հիւանդները՚, դատապարտելով անոնց օդային ռմբակոծումը եւս:
ՙՌոյթըրզ՚ լրատու գործակալութիւնը եւ ՙԻփսոս՚ հաստատութիւնը կատարեցին միացեալ հարցախոյզ մը եւ բացայայտեցին, թէ նուազած է ամերիկեան ժողովրդային աջակցութիւնը իսրայէլեան ռազմական գործողութիւններուն: Երկու օրուան ընթացքին կատարուած հարցախոյզի արդիւնքները ցոյց տուին, որ ամերիկացիներուն միայն 32 առ հարիւրը կը պահանջէ ամերիկեան օգնութիւն տրամադրել Իսրայէլին, մինչ 13 Հոկտեմբերին այդ համեմատութիւնը հասած էր 41 առ հարիւրի:
