Ուրբաթ երեկոյեան, Ս.Դ.Հ.Կ. Լիբանանի Շրջանի Վարիչ Մարմինը իր կեդրոնատեղիին մէջ ընդունեց Ուրուկուէյի Շրջանի Վարիչ Մարմինի ատենապետ Ընկ. Տիէկօ Գարամանուկեանը:
Հանդիպման ներկայ էին Ս.Դ.Հ.Կ. Կեդրոնական վարչութեան անդամ Ընկ. Ալեքսան Քէօշկէրեանը եւ Լիբանանի Շրջանի Վարիչ Մարմինի ատենապետ Ընկ. Վանիկ Տագէսեանը եւ անդամներ:
Զրոյցը կայացաւ Արցախի եւ Հայաստանի վերջին իրադարձութիւններուն մասին, ինչպէս նաեւ կուսակցական կազմակերպչական աշխատանքներուն շուրջ:
Յատուկ կերպով շեշտուեցաւ Արցախի բնակչութեան դիմագրաւած ծանր դժուարութիւնները եւ անոնց կրած հոգեկան եւ ֆիզիքական ահաւոր վիճակները:
Յարգելի հիւրը բացատրեց Ուրուկուէյի մէջ Կուսակցութեան տարած աշխատանքները, որոնց գլխաւոր նպատակն է աշխուժացնել տեղւոյն երիտասարդական ներուժը:
Ան ցաւ յայտնեց Լիբանանի դիմագրաւած տնտեսական, ընկերային եւ ապահովական ծանր պայմաններուն, յուսալով որ Սփիւռքի մէջ այն միշտ պիտի մնայ հայապահպանման փարոսը։
