ԱՄՆ-ի պաշտպանութեան նախարար Լոյտ Օսթըն յայտարարեց, թէ կը համագործակցին Իսրայէլի հետ ՙՀամաս՚ի կողմէ գերի տարուած պատանդներու ազատ արձակումին համար: Օսթըն յայտարարեց, թէ ՙՀամաս՚ չի ներկայացներ պաղեստինցի ժողովուրդը եւ անոր օգտագործած միջոցները կը յիշեցնեն ՙԻսլամական պետութեան՚ ոճը: Ան սպառնաց որեւէ կողմի, որ կը մտածէ ընդարձակել այս պատերազմը:
Իր կողմէ, Իսրայէլի պաշտպանութեան նախարար Եոավ Կալանթ յայտարարեց, թէ ԱՄՆ-ի նեցուկը իրենց առիթ պիտի տայ շարժելու: Ան աւելցուց, որ ՙՀամաս՚ կը վայելէ Իրանի նեցուկը ու անոր աշխատանքի ձեւը կը նմանի ՙԻսլամական պետութիւն՚ ահաբեկչական շարժումի ձեւին: Կալանթ աւելցուց, որ պատերազմը կրնայ երկար տեւել, սակայն իրենք պիտի յաղթեն ու ՙՀամաս՚ը հեռացնեն Կազայէն:
