Մասքաթի մէջ տեղի ունեցած են քաղաքական խորհրդակցութիւններ Հայաստանի հանրապետութեան եւ Օմանի սուլթանութեան արտաքին գործերու նախարարութիւններուն միջեւª ՀՀ արտաքին գործերու նախարարի տեղակալ Վահան Կոստանեանի եւ Օմանի արտաքին գործերու նախարարի քաղաքական հարցերով տեղակալ Շէյխ Խալիֆա Ալ Հարիսի գլխաւորութեամբ:
Քաղաքական խորհրդակցութիւններու ընթացքին կողմերը միտքեր փոխանակած են երկկողմ եւ բազմակողմ հարթակներու մէջ համագործակցութեան շուրջ, կարեւորած են երկու երկիրներուն միջեւ տնտեսական համագործակցութեան խթանումը: Երկուստեք ընդգծուած է վերականգնուող ուժանիւթի, տեղեկատուական արհեստագիտութիւններու, արհեստական բանականութեան, առողջապահութեան ոլորտներուն, ինչպէս նաեւ գիւղատնտեսութեան եւ զբօսաշրջութեան բնագաւառներուն մէջ համագործակցութեան կարեւորութիւնը:
Խորհրդակցութիւններու ընթացքին անդրադարձ կատարուած է նաեւ Հարաւային Կովկասի եւ Մերձաւոր Արեւելքի մէջ տարածաշրջանային եւ անվտանգային խնդիրներուն:
Արտաքին գործերու նախարարի տեղակալ Վահան Կոստանեան Օմանի իր գործընկերոջն ներկայացուցած է ատրպէյճանական յարձակման պատճառով Լեռնային Ղարաբաղի ժողովուրդի զանգուածային բռնի տեղահանման հետեւանքով ստեղծուած մարդասիրական ճգնաժամային իրավիճակը£
Այցի ընթացքին արտաքին գործերու նախարարին տեղակալը հանդիպում ունեցած է նաեւ Օմանի առեւտուրի, արդիւնաբերութեան եւ ներդրումներու յառաջմղման նախարարի տեղակալ Իպթիսամ Ահմատ Սայիտ Ալ Ֆարուճիի հետ: Հայկական պատուիրակութիւնը ճանաչողական այց կատարած է ՙԻնվեսթ Օման՚ ցուցասրահ:
