Ազգային ազատ հոսանքի նախագահ Ժըպրան Պասիլ վերսին ահազանգեց սուրիացիներու տեղահանութեան առնչութեամբ Լիբանանի դէմ ցցուած վտանգներէն: Հոսանքի Զահլէի մասնաճիւղի ընթրիքին ընթացքին, Պասիլ կառավարութենէն պահանջեց երկխօսութիւն կատարել Դամասկոսի հետ եւ համաձայնիլ տեղահանուածներու տունդարձին մասին: Ան նաեւ պահանջեց փակել Լիբանանի սահմանըª կանխելու տեղահանուածներուն երկիր մուտքը: Պասիլ առաջարկեց գրաւ չդնել Հըզպալլայի կամ Իրանի դէմ ամերիկեան հաւանական հարուածի կամ սուրիական-սէուտական համաձայնութեան վրայª ընտրելու համար հանրապետութեան նոր նախագահը, առաջարկելով իշխանութիւնը ձեւաւորել ներլիբանանեան համաձայնութեամբ եւ հիմնուիլ արմատական բարեկարգումներու ծրագրի վրայ:
Իսկ ներքին գործերու նախարարի պաշտօնակատար Պասսամ Մաուլաուի ահազանգեց, թէ սուրիացիներու տեղահանութիւնն ու դէպի Լիբանան շարունակական հոսքը դարձած է անտանելի, որովհետեւ սկսած է վտանգել Լիբանանի ժողովրդագրական դրութիւնը: Մաուլաուի անընդունելի համարեց գաղթականներու հարցերով զբաղող ՄԱԿ-ի գործակալութեան անկանոն աշխատանքը Լիբանանի մէջ, պահանջելով անյապաղ պետութեան յանձնել տեղահանուածներու տուեալները:
