Շաբաթավերջին շարունակուեցան նաեւ միջազգային մեկնաբանութիւնները, որոնք չհատեցին խօսքերու սահմանը եւ չվերածուեցան գործի:
Եւրոխորհրդարանի անդամ Նաթալի Լուազօ յայտնեց, որ զայրացած է եւ ամօթ կը զգայ, որովհետեւ Արցախի մէջ տեղի կ’ունենայ ցեղային զտում, մինչ աշխարհը անտարբեր կը հետեւի: ՙՄեզ այս մասին զգուշացուցին ամիսներ շարունակ: Հայ ժողովուրդը կ’ապրի 21-րդ դարու առաջին ցեղային զտումը եւ ինչպէս 1915-ին, այս տարի եւս մարդիկ ուրիշ կողմ կը նային՚, բողոքեց Լուազօ:
Հռոմի Ֆրանչիսկոս պապը կիրակնօրեայ աղօքթին ընթացքին Պաքուին ու Երեւանին կոչ ուղղեց երկխօսութիւն կատարելու Արցախի բռնի տեղահանուածներու իրավիճակին շուրջ: Ան նաեւ աղօթեց ՙտառապեալ Ուքրանիոյ պատերազմէն վիրաւոր բոլոր հողերուն համար՚:
Վրաստանի հայ համայնքը երթ եւ բողոքի ցոյց կատարեց Եւրոմիութեան ներկայացուցչութեան գրասենեակներուն առջեւ: Հայեր նաեւ հաւաքուեցան ՄԱԿ-ի Վրաստանի գրասենեակներուն դիմացª բողոքելով Արցախի դէմ ատրպէյճանական բռնութիւններէն: Բողոքի հաւաք տեղի ունեցաւ նաեւ Մարսէյի մէջ, ուր ֆրանսահայեր աջակցութիւն յայտնեցին արցախահայերուն:
