Արցախի դատարկ գիւղերն ու քաղաքները դիտարկելու նպատակով, երէկ վերջապէս իրենց բնորոշ ուշացումով ժամանեց ՄԱԿ-ի պատուիրակութիւնը: Արցախի արտակարգ իրավիճակներու պետական ծառայութեան տեղեկատուութեան եւ հասարակայնութեան հետ կապերու բաժնի պետ Յունան Թադեւոսեան դիտել տուաւ, որ պատուիրակութեան այցելութիւնը ուշացած է եւ կը կրէ ձեւական, ոչ-բովանդակային բնոյթ: Ան բացառեց, որ Ստեփանակերտի մէջ մնացած ըլլայ 7 երեխաներով մայր մը: ՙՀիմնական բնակչութիւն չէ մնացած Ստեփանակերտի մէջ՚, ըսաւ պաշտօնատարըª աւելցնելով, որ Արցախի մէջ տակաւին կը գտնուին նախկին նախագահները, քաղաքական ղեկավարութիւնը եւ փրկարարներ, որոնք կը շարունակեն զոհերու աճիւններու որոնողական աշխատանքերը:
Արցախահայութեան մեծամասնութիւնը արդէն ակամայ լքած է հայրենի հողը եւ ապաստանած է Հայաստան: Երէկ երեկոյեան դրութեամբ Հայաստան փոխադրուած արցախահայերուն թիւը հատած էր հարիւր հազարի սահմանը:
Արցախի մարդասիրական ճգնաժամը կառավարող աշխատանքային խումբի ներկայացուցիչ Վարդան Սարգսեան երէկ յայտնեց, որ գրեթէ դադրած է արցախցիներուն Հայաստան հոսքը: Սարգսեանի համաձայն, բազմացած է պետութեան տրամադրած կեցավայրերէն օգտուողներուն թիւը: ՙԱյդ կեցավայրերը ժամանակաւոր են, սակայն կան տեղեր, որոնք հետագային կրնան դառնալ աւելի երկարաժամկէտ տրամադրուող վայրեր՚, ըսաւ Վարդան Սարգսեանª աւելցնելով, որ չէ եղած կեցութեան համար դիմած մարդ, որուն մնալու վայր չէ ապահովուած: Միայնակ տարեցներուն, հաշմանդամներուն հետ կապուած խնդիրները լուծած են Աշխատանքի եւ ընկերային հարցերու նախարարութեան աջակցութեամբ: Վարդան Սարգսեան նշեց, որ սահմանը հատած է 21.103 փոխադրութեան միջոց: Հայաստանի կառավարութեան տրամադրած կեցավայրերէն մինչեւ երէկ օգտուած էր 47.322 տեղահանուած արցախցի: Հայաստանի փոխվարչապետ Տիգրան Խաչատուրեան յայտնեց, որ իւրաքանչիւր արցախցիի պիտի տրամադրուի 40 դրամի աջակցութիւնª անկախ տարիքէն: 10 հազար դրամի օգնութիւն ալ պիտի յատկացուի ապրուստային ծախսերու համար: Ըստ Խաչատուրեանի, օգնութիւնը պիտի չտրամադրուի այն արցախցիներուն, որոնք բնակարան ունին Հայաստանի մէջ:
