Արամ Խաչատուրեանի ծննդեան 120-ամեակին առիթով, Կիրակի, 17 Սեպտեմբեր 2023-ին, Դամասկոսի ՆՍՄՄ-ի եւ ՀՄՄ-ի վարչութիւններու յամառ եւ միասնական աշխատանքով, ՀՄՄ ակումբի շքեղ սրահին մէջ փայլուն միջոցառում մը տեղի ունեցաւ, բարձր հովանաւորութեամբ եւ ներկայութեամբ թեմիս բարեջան առաջնորդ Տէր Արմաշ Եպս. Նալպանտեանի£ Հանդիսութեան ներկայ էին ՍԴՀԿ Կեդրոնական վարչութեան անդամ ընկեր Տոքթ. Վազգէն Համալեան, ՍԴՀԿ Դամասկոսի Վարիչ Մարմինի ատենապետ ընկեր Խորէն Չարքեան եւ վարչութեան անդամները, քոյր միութիւններու ներկայացուցիչներ եւ հիւրեր:
Յայտագիրը սկսաւ Սուրիոյ եւ Հայաստանի օրհներգներով£ Բացման խօսքով հանդէս եկաւ Անոյշ Քէօրօղլեան-Մարաշլեան եւ օրը համարեց տօնական:
Վաւերագրական ֆիլմ մը ցուցադրուեցաւ ներկաներուն, որ ՙՇողակաթ՚ ընկերութեան յատուկ պատրաստութիւնն էր:
Երգչախումբը ՙՀայոց Օրհներգ՚ը եւ ՙԳարուն Երեւան՚ երգերը երգեց, Հայրենիքին արեւշատութիւն եւ բարօրութեան մաղթանքերով:
Տեսերիզով արձանագրուած նուագ մը մասնաւոր պատրաստած էր այս առթիւ: Սրինգի եւ դաշնամուրի ընկերակցութեամբ, տիկին Անի Աբրահամեան Ստեփանեան եւ Սվեթլանա Մերքիրովա նուագեցին Ա. Խաչատուրեանէն ՙԼեզկինկա՚ եւ ՙՕրօրոցային՚:
Ճօրճ Մարաշլեանը իր գեղեցիկ եւ թովիչ ձայնով ներկաներուն բարձր տրամադրութիւն պարգեւեց երգելով ՙՀայաստանի կարմիր գինին՚ եւ ՙՊեպոյի երգը՚:
Մասնաւոր եւ հետաքրքրական տեսերիզ մը պատրաստուած էր Գարին Գոճայեանէն, որ ՙԽաչատուրեանը օտարներու ակնոցով՚ կը ներկայացնէր:
Ալիսիա Գասարճեան դաշնամուրի ընկերակցութեամբ ՙwalts from masquerade՚ նուագեց:
Դամասկոսի ՆՍՄՄ-եան ՙՄեղրի՚ պարախումբի խումբ մը աղջիկներ կանացի գեղեցիկ շարժումներով պարեցին ՙՈւզունտարա՚ պարը ՙԳայիանէ՚ պալէէն: Պարուսոյց` Սեւան Մարաշլեան:
Բանախօսին կենսագրութիւնը ներկայացուց Տիկ. Անի Պալասանեան Գոճայեան:
Օրուան պատուական բանախօսն էր Դամասկոսի ՙՔնար՚ երգչախումբի նախկին ղեկավար տիար Շանթ Քէշիշեանը, որ ներկայացուց մեծ երգահան` Արամ Խաչատուրեան մարդը, երաժիշտը, հայը, ապա ժամանակագրական կարգով անոր գլխաւոր գործերը:
Խաչատուրեանի թաղումը (վաւերագրական) ֆիլմ:
ՙԳայիանէ՚ պալէի պատմական բացատրութիւնը ներկայացուց Սեւան Մարաշլեան:
ՀՄՄ-ի անգերազանցելի փողերախումբը հրամցուց ՙԳայիանէ՚էն ՙՎարդագոյն աղջիկներու պարը՚ եւ բարձր ծափահարութիւններու տարափով ողջունելի եղաւ ներկաներուն կողմէ:
Տէր Արմաշ Եպս. Նալպանտեան արտի խօսքով հանդէս եկաւ. յիշեց հետաքրքրական եւ անկրկնելի դրուագներ Խաչատուրեանէն: Օրհնեց ձեռնարկի յաջողութեան նպաստած ՆՍՄՄ-ը, ՀՄՄ-ի վարչութիւնը, աշխատողները եւ բոլոր մաս կազմող սկաուտները, ապա ՙՊահպանիչ՚ով փակեց յայտագիրը:
Ակումբիս բակին մէջ տօնական մթնոլորտը շարունակուեցաւ սուրճով, հիւրասիրութեամբ եւ բարեկամներու հաճելի զրոյցներով:
ԱՆՈՅՇ ՔԷՕՐՕՂԼԵԱՆ ՄԱՐԱՇԼԵԱՆ
