Թուրքիոյ արտաքին գործերու նախարար Հաքան Ֆիտան պատմական համարեց Իրանի հետ Թուրքիոյ յարաբերութիւնները, շնորհակալութիւն յայտնելով Թեհրանինª երկրաշարժէն ետք Անգարային տրամադրած օգնութեան համար: Թեհրանի մէջ իր իրանցի պաշտօնակից Հըսէյն Ամիր Ապտէլ Լահիանի հետ տեսակցելէ ետք Ֆիտան նշեց, որ քննարկած են նաեւ ՙահաբեկչական կազմակերպութիւններունª ներառեալ Քիւրտիստանի աշխատաւորական կուսակցութիւնը՚ նիւթը եւ կեդրոնացած են խնդիրները դիւանագիտական խաղաղ միջոցներով լուծելու անհրաժեշտութեան վրայ: ՙԱրծարծեցինք սուրիական հարցի լուծումի միջոցները եւ կարեւորեցինք տեղահանուած սուրիացիներու կամովին տունդարձը՚, ըսաւ թուրք նախարարը:
Ապտէլ Լահիան իր կարգին նշեց, որ Անգարա ողջունած է Ռիատ-Թեհրան յարաբերութիւններու բնականոնացումը, աւելցնելով, որ աշխատանք կը տարուի կազմակերպելու Իրան-Թուրքիա-Սէուտական Արաբիա գագաթաժողով մըª քննարկելու տարածաշրջանային համագործակցութեան հեռանկարները: ՙՇեշտեցինք Սուրիոյ գերիշխանութեան ու տարածքային ամբողջականութեան պահպանումը եւ դրուատեցինք Թուրքիոյ կառուցողական կեցուածքըª Սուրիոյ հետ սահմանային հարցերուն եւ տեղահանուածներու տունդարձի թղթածրարին առնչութեամբ՚, ըսաւ իրանցի նախարարը:
Սուրիոյ նախագահ Պաշշար Ասատ չեղարկեց 55 տարի առաջ վաւերացուած օրէնք մը, որ կը վերաբերի զինուորական հրապարակային դատարաններու գործունէութեանց: Նոր որոշումով Ասատ չեղարկեց նման դատարաններ հաստատելու մասին 1968-ին հրապարակուած օրէնքը եւ համապատասխան բոլոր թղթածրարները փոխանցեց զինուորական ատեանին:
Իսկ պաշտօնական ՙՍԱՆԱ՚ լրատու գործակալութիւնը հաղորդեց, թէ երէկ առաւօտեան Տըրաայի Նաուա բնակավայրին մէջ ահաբեկուած է իշխող Պաաս կուսակցութեան պատասխանատուներէն մէկը:
