Լիբանանեան ուժեր կուսակութեան նախագահ Սամիր Ժաաժաա նշեց, որ ՙԷլիաս Հասրունիի ահաբեկումը հարաւի մէջ ցուցանիշն է այն երկխօսութեան, որուն մասին ամիսներէ կը խօսի միւս խմբաւորումը՚: Ժաաժաա դիտել տուաւ, որ Հասրունիի առեւանգումին եւ ահաբեկումին մասնակցած չորս ինքնաշարժներէն մէկը ժամանած է Այթա Շաապէն, միւսըª Պընթ Ժպէյլէն, երրորդըª Հանինէն, իսկ վերջինըª Պարհաշիթէն: ՙԱյս է լիբանանցիներու պաշտպանութիւնը, որուն մասին կը յայտարարեն ամէն օր, այս է երկխօսութիւնը, որուն համար կոչեր կ’ուղղեն: Լիբանանի մէջ դիմադրութեան ճակատը ոճրային խմբաւորում է: Հըզպալլա Լիբանանի մէջ կը վարուի այնպէս ինչպէս կ’ուզէ, խախտելով բոլոր օրէնքներն ու Սահմանադրութիւնը, անտեսելով մնացեալ լիբանանցիներուն կարծիքը՚, ըսաւ Ժաաժաա, ՙԼիբանանեան դիմադրութեան նահատակներու՚ յիշատակին նուիրուած պատարագէն ետք իր արտասանած խօսքին մէջ: Անոր համաձայն, ժամը հասած է, որ լիբանանցիները որոշում կայացնեն: ՙԱրդեօք ա՞յս է մեր ուզած Լիբանանը, ա՞յս է երկիրը, որուն համար յոգնեցանք եւ զոհուեցանք՚, հարց տուաւ Ժաաժաա եւ զարմանք յայտնեց, թէ ՙինչպէ՞ս ոմանք տակաւին կը փորձեն գործարք կնքել Հըզպալլայի հետ, գործուած բոլոր ոճիներէն ետք՚:
