Հայաստանի տարածքային կառավարման եւ ենթակառուցուածքներու նախարար Գնէլ Սանոսեան ընդունած է Հայաստանի Հանրապետութեան մէջ Իրանի Իսլամական Հանրապետութեան նորանշանակ արտակարգ եւ լիազօր դեսպան Մեհտի Սոպհանիի գլխաւորած պատուիրակութիւնը:
Նախարարը ողջունած է նորանշանակ դեսպանը եւ յաջողութիւններ մաղթած է հայաստանեան առաքելութեան ընթացքին: Երկուստեք կարեւորուած է հայ-իրանեան ջերմ, բարեկամական յարաբերութիւնները եւ զայն խորացնելու անհրաժեշտութիւնը:
ՙՈւրախալի է փաստել, որ մեր յարաբերութիւնները լաւ կշռոյթներով կը զարգանան, բայց առկայ է մեծ ներուժ այլ ուղղութիւններով եւս յարաբերութիւնները զարգացնելու, խորացնելու համար՚, ըսած է նախարարը` ընդգծելով յատկապէս ուժանիւթային ոլորտին մէջ առկայ համագործակցութեան կարեւորութիւնը:
Հանդիպման ժամանակ քննարկուած է համատեղ իրականացուող ծրագիրներու ընթացքը: Նախարարը կարեւորած է ծրագիրները սահմանուած ժամկէտերու մէջ աւարտելու անհրաժեշտութիւնը:
Ընդգծած է յատկապէս Իրան-Հայաստան երրորդ ելեկտրահաղորդման գիծի շինարարութիւնը շուտափոյթ աւարտելու անհրաժեշտութիւնը: Դեսպանը հաւաստիացուցած է, որ հետամուտ պիտի ըլլայ, որ Հայաստանի մէջ իրականացուող ծրագիրներով աշխատանքները սահմանուած ժամկէտերու մէջ աւարտին:
Երկուստեք կարեւորուած է իրանեան շինարարական ընկերութիւններու ներգրաւուածութիւնը հայաստանեան շինարարական գործընթացներուն: Քննարկուած են նաեւ ճանապարհաշինութեան, հանքարդիւնաբերութեան ոլորտներուն վրաբերող հարցեր:
