Ուժանիւթի եւ ջուրի հարցերու նախարարի պաշտօնակատարի գրասենեակը ժխտեց վառելանիւթի նաւերուն հարցով նախարարին ուղղուած ամբաստանութիւնները: Հաղորդագրութիւնը պնդեց, որ վառելանիւթի նաւերը Լիբանան կը բերուին օրինական գնումի միջոցներով եւ կառավարութեան համաձայնութեամբª գործադրելու համար ելեկտրականութեան արտակարգ ծրագիրը: Հաղորդագրութիւնը յիշեցուց, որ նախարարութեան ծրագիրը կը կեդրոնանայ ելեկտրամատակարարումի ժամերը բազմացնելու զուգահեռ վճարներուն սակագինը բարձրացնելու վրայ, աւելցնելով որ ելեկտրականութեան սակագինը 40 առ հարիւրի չափով նուազ է ելեկտրածին սեփական սարքերու վճարներէն: ՙԼիբանանի մէջ ելեկտրականութեան ոլորտին վիճակը յուսահատական չէ, թէեւ այդպէս կը փորձեն քարոզել որոշ ծանօթ շրջանակներ ու լրատուամիջոցներ՚, նշուած է Ուժանիւթի նախարարութեան յայտարարութեան մէջ: ՙԵլեկտրամատակարարումի ժամերը բազմացան եւ աւելի պիտի բազմանան, եթէ բոլոր առնչակից կողմերը համագործակցին ու վառելանիւթի նաւը հասնի Լիբանան, որովհետեւ Ելեկտրականութեան հաստատութեան մօտ մնացած վառելանիւթը բաւարար է միայն մէկ ամսուան համար: Առանց վառելանիւթ ներածելու կարելի չէ բարելաւել ելեկտրամատակարարումը՚, նշուած է յայտարարութեան մէջ:
Միւս կողմէ, վարչապետի պաշտօնակատար Նեժիպ Միքաթի կտրականապէս կը մերժէ 30 միլիոն տոլար տրամադրել վառելանիւթի նաւերուն համար, հաւաստիացնելով որ Լիբանանի մէջ մինչեւ Հոկտեմբեր բաւարար վառելանիւթ կայ, նաեւ ուժանիւթի նախարարը խախտած է կառավարութեան որոշումին կցուած պայմանները, մերժելով յայտարարել վառելանիւթ գնելու նուազուրդ: Ուստի, բարձրաստիճան պաշտօնատարներուն միջեւ այս տարակարծութիւններուն լոյսին տակ բացառուած չէ, որ յառաջիկայ շաբաթներուն կրկնուի ելեկտրականութեան ճգնաժամը:
Իսկ հանրօգուտ աշխատանքներու եւ փոխադրութեան հարցերու նախարարի պաշտօնակատար Ալ Համիէ յայտնեց, որ Պէյրութի միջազգային օդակայանի եւ նաւահանգիստի ելեկտրամատակարարումը կը համարուի կարմիր գիծ մը, սակայն այդ առաքելութիւնը կարելի չէ իրականացնել առանց ֆինանսաւորումի:
