Կիւմրու Արհեստագիտական կեդրոնին մէջ տեղի ունեցաւ ՙMEDS Կիւմրի 2023՚ աշխատարանի բացումը:
Ճարտարապետներու ՙMEDS Կիւմրի 2023՚-ի ընթացքին պիտի ներկայացուին 10 ճարտարապետական փոքր ձեւեր, որոնք պիտի ստեղծեն 150 մասնակցներն ու անոնց ղեկավարները:
ՙMEDS Կիւմրի 2023՚-ի շրջանակներուն մէջ երկու շաբաթ Գարեգին Նժդեհ փողոցի յարակից տարածքը պիտի վերածուի մեծ աշխատարանի, ուր օրեր շարունակ մասնակիցները պիտի իրականացնեն տարբեր նախագիծեր:
Աշխատանքներէն 8 հատը պիտի ըլլան ֆիզիքական, երկուքը` թուային-վիզուալ:
ՙMEDS՚-ը 2010 թուականէն գոյութիւն ունեցող աշխատարան է, որ ամէն տարի կ՛իրականացուի եւրոպական որեւէ երկրի մէջ: 2019 թուականին տեղի ունեցած մրցոյթին յաղթած է Հայաստանի խումբը եւ խումբին կողմէ յաջորդ մրցոյթի կայացման վայր ընտրուած է Կիւմրին: Ծրագրի նախապատրաստական փուլին տեղի պիտի ունենայ երկու մրցոյթ` առաջին մրցոյթը նախագիծերուն համար է, իսկ երկրորդը` մասնակիցներուն: Մասնակիցներուն մրցոյթը յաղթահարածները ծրագրի շրջանակներուն մէջ այնուհետ աշխատանքներ կ՛իրականացնեն կազմակերպիչներու ընտրած քաղաքին մէջ:
Կիւմրի համայնքի ղեկավար Վարդգէս Սամսոնեանը, անդրադառնալով իրականացուող ծրագրին, խօսած է անոր կարեւորութեան մասին: ՙԱնչափ կարեւոր են այսօրինակ ծրագիրները, առաւել կարեւոր` ճարտարապետական եւ մշակութային հարուստ ժառանգութիւն ունեցող մեր քաղաքին համար: Մենք կը համագործակցինք խումբին հետ, ունեցած ենք հանդիպում-քննարկումներ եւ, ի սկզբանէ, տուած ենք մեր դրական գնահատականը ու յայտնածª աջակցելու պատրաստակամութիւն: Ունինք կնքուած համաձայնագիր. Կիւմրի քաղաքի պատմամշակութային առանձնայատկութիւններն ու ազգային նկարագիրը հաշուի առնելով` իրականացնել քաղաքին պրենտաւորման, զբօսաշրջային գրաւչութեան, տեղական արտադրողներու արտադրանքի հանրահռչակման, քաղաքային մշակոյթի զարգացման, համայնքային փոխադրութեան կանգառներու պայմաններու բարելաւման միտուած ծրագրեր` կիրառելով այնպիսի գործիքակազմ, որ պիտի արտայայտէ կողմերուն փոխադարձ կամքը՚, աւելցուցած է Վարդգէս Սամսոնեանը:
