Կազմակերպութեամբ Նոր Սերունդ Մշակութային Միութեան Ընկերային դիւանին, Ուրբաթ, 14 Յուլիս 2023-ին, տեղի ունեցաւ բացառիկ շրջապտոյտ մը դէպի Լիբանանի գեղեցիկ լեռները:
Արդարեւ, առաւօտեան ժամը 8:30-ին, շրջապտոյտը սկիզբ առաւ Նոր Հաճնոյ յարակից մայրուղիէն մեկնելով դէպի Ֆարայա, ուր զետեղուած էր Սուրբ Շարպէլի հսկայ արձանը գիւղի բարձրագոյն բլուրին վրայ:
Ուխտաւորները այցելեցին եկեղեցին եւ իրենց աղօթքները բարձրացուցին առ Աստուած, եւ մաքուր օդը վայելելով հիւրասիրուեցան սուրճով եւ նախաճաշով:
Ապա մեկնեցան դէպի Լիբանանի նշանաւոր գիւղերէն Ֆաքրա, ուր ծանօթացան տեղւոյն գեղեցիկ պանդոկներուն եւ ձմեռ ժամանակ դահոյկի յատուկ կեդրոններուն:
Նոյն ճամբուն վրայ ծանօթացան նաեւ Քանաթ Պաքիշ յայտնի բլուրին, եւ ապա դէպի Քֆարտպիէն, հանրածանօթ Պիսքանթա գիւղը եւ ապա դէպի Սաննին:
Սաննինի մուտքին այցելեցին Սուրբ Սասին վանքը, ուր հիւրընկալուեցան վանքի մայրապետներուն կողմէ օշարակներով եւ քաղցրաւենիքներով:
Վանքի եկեղեցւոյ պատմութիւնը իր հիմնադրութենէն մինչեւ կատարուած հրաշքներու մասին լայն բացատրութիւն տուաւ վանքի մայրապետներէն մին: Ներկաները մեծ գոհացում ստացան:
Հասան Սաննինի բարձրագոյն լերան գագաթը, ուր համադամ ճաշերը պատրաստուած էին եւ բոլոր ներկաները ճաշեցին լիբանանեան համով խորովածներն ու աղանդերները:
Ներկաները շատ բարձր տրամադրութեան մէջ էին եւ իրենց ուրախութիւնը յայտնեցին երգերով եւ պարերով: Ճաշէն ետք շրջապտոյտը շարունակուեցաւ դէպի Պթղրին գիւղը, ուր համտեսելէ ետք համով պաղպաղակները, այցելեցին մայրավանքը եւ իրենց աղօթքներն ու ուխտերը կատարելէ ետք բարձր տրամադրութեամբ վերադարձան դէպի Պէյրութ:
Այսպիսի շրջապտոյտներ առիթ կու տան տիկիններուն ծանօթանալու Լիբանանի տեսարժան վայրերուն, եւ օգկտակարը հաճելիին միացնելով կը մոռնան եւ կ’անջատուին իրենց առօրեայ տաղտուկներէն եւ մտահոգութիւններէն, անցընելով ուրախ եւ անմոռանալի օր մը:
Վարձքը կատար Նոր Սերունդ Մշակութային Միութեան Ընկերային դիւանի բոլոր անդամներուն, որոնք ջանք չէին խնայած առաւելագոյն կերպով լաւ կազմակերպելու սոյն շրջապտոյտը եւ բարձր գոհունակութիւն տալու բոլոր մասնակիցներուն:
ՆԵՐԿԱՅ ՄԸ
