Ռուսիան խստօրէն կոչ կ՛ընէ Ատրպէյճանի ղեկավարութեան` շտապ միջոցներ ձեռնարկելու Լաչինի միջանցքը անյապաղ ապաշրջափակելու համար: Այս մասին յայտարարութիւն տարածած է Ռուսաստանի դաշնութեան Արտաքին գործերու նախարարութիւնը եւ մտահոգիչ համարած է, որ այսօր Լեռնային Ղարաբաղի շուրջ իրավիճակը կը զարգանայ բացասական բնագրով:
ՙՄարդասիրական ճգնաժամը երլալով կը խորանայ: Բնակչութիւնը սննդամթերքի, դեղորայքի, առաջին անհրաժեշտութեան ապրանքներու սուր պակաս ունի, գործնականին մէջ զրկուած է ելեկտրականութենէն ու կազէն: Սա կրնայ ամենադրամատիկ հետեւանքները բերել Ղարաբաղի հայութեան` շրջանի հասարակ բնակիչներուն համար: Մենք խստօրէն կոչ կ՛ընենք Ատրպէյճանի ղեկավարութեան` շտապ միջոցներ ձեռնարկելոպ` Լաչինի միջանցքը անյապաղ ապաշրջափակելու, երկու ուղղութեամբ քաղաքացիներու, փոխադրութեան միջոցներու, բեռներու անխոչընդոտ տեղաշարժը վերսկսելու համար, ինչպէս նաեւ վերականգնելու ելեկտրամատակարարումը՚, ըսուած է յայտարարութեան մէջ:
Ռուսիոյ արտաքին գերատեսչութենէն նաեւ նշած են, որ 2022 թուականի Հոկտեմբերին եւ 2023 թուականի Մայիսին ԵՄ հովանիին ներքոյ տեղի ունեցող հանդիպումներուն Հայաստանը ճանչցած է Լեռնային Ղարաբաղը որպէս Ատրպէյճանի մաս:
ՙՄենք կը յարգենք Հայաստանի ղեկավարութեան ինքնիշխան որոշումը, բայց այդ արմատապէս փոխած է այն հիմնարար պայմանները, որոնց ներքոյ ստորագրուած է Ռուսիոյ, Հայաստանի եւ Ատրպէյճանի ղեկավարներուն 2020 թուականի Նոյեմբեր 9-ի յայտարարութիւնը, ինչպէս նաեւ տարածաշրջանին մէջ տեղակայուած ռուսական խաղաղապահ զօրախումբին կարգավիճակը: Կը կարծենք, որ այս պայմաններուն մէջ Ղարաբաղի հայ բնակչութեան ճակատագրին պատասխանատուութիւնը պէտք չէ տեղափոխուի երրորդ երկիրներու վրայ: Անհրաժեշտ է անյապաղ սկսիլ Պաքուի եւ Երեւանի միջեւ խաղաղութեան պայմանագրի նախապատրաստումը` նախապէս ձեռք բերուած պայմանաւորուածութիւններու հիման վրայ՚, նշած են Ռուսիոյ Արտաքին գործերու նախարարութենէն:
Ռուսական կողմը շեշտած է, որ այդ համաձայնագրի անբաժանելի մասը պէտք է ըլլան Ղարաբաղի հայերու իրաւունքներուն եւ անվտանգութեան յուսալի եւ յստակ երաշխիքները, ինչպէս նաեւ Ռուսաստանի, Հայաստանի եւ Ատրպէյճանի միջեւ եռակողմ պայմանագրերու ամբողջ փաթեթի խիստ կատարումը, այդ շարքին` ճանապարհային հաղորդակցութիւններու ապաշրջափակումը եւ հայ-ատրպէյճանական սահմանի սահմանազատման գործընթացին մեկնարկը:
Ռուսիոյ Արտաքին գործերու նախարարութենէն յաւելած են, որ հաշուի առնելով վերոգրեալը` ռուսական կողմը կը հաստատէ ԼՂ-ի մէջ բնականոն կեանքի վերականգնման ուղղուած միջազգային հանրութեան ջանքեուն աշխուժօրէն նպաստելու իր վճռականութիւնը: Ռուսիան պատրաստ է մօտ ապագային Մոսկուայի մէջ կազմակերպելու արտաքին գործերու նախարարներու եռակողմ հանդիպում` քննարկելու ամենաբարձր մակարդակով պայմանաւորուածութիւններու իրականացման ուղիները, այդ շարքին` խաղաղութեան պայմանագրի համաձայնեցման հարցը` ռուս-ատրպէյճանա-հայկական գագաթաժողովի կազմակերպման հեռանկարով` այդ փաստաթղթի ստորագրման համար:
