Արցախի կառավարութիւնը որոշում կայացուցած է մինչեւ Յուլիս 11-ի առաւօտեան Արցախի ամբողջ տարածքին ապահովել շուրջօրեայ ելեկտրամատակարարում` վեցժամեայ հովհարային անջատումներու նոյն ժամանակացոյցով: Այս մասին կը տեղեկացնէ Արցախի տեղեկատուական շտաբը:
Հաղորդագրութեան մէջ նշուած է. ՙՀաշուի առնելով Հայաստանէն Արցախ կազամատակարարման վերականգնումը եւ նաեւ վառելանիւթի խիստ սղութեամբ պայմանաւորուած ինքնաշարժի կազալիցքաւորման մեծ պահանջարկը` կառավարութեան կողմէ որոշում կայացուած է մինչեւ Յուլիս 11-ի առաւօտեան Արցախի ամբողջ տարածքին ապահովել շուրջօրեայ ելեկտրամատակարարում: Անոր շնորհիւ հնարաւոր պիտի ըլլայ կազմակերպել ինքնաշարժի կազի կայարաններու շուրջօրեայ աշխատանքը եւ հնարաւորինս մեծ քանակի ինքնաշարժի կազալիցքաւորումը:
Նշուած ժամկէտի մէջ ելեկտրականութեան յաւելեալ ծաւալի մատակարարումը պիտի կազմակերպուի Սարսանգի ջրամբարի պաշարներու յաւելեալ օգտագործմամբ ելեկտրուժի արտադրանքի ծաւալի աւելացման շնորհիւ: Յուլիս 11-էն ելեկտրամատակարարման համակարգը կրկին պիտի գործէ վեցժամեայ հովհարային անջատումներու նոյն ժամանակացոյցով, քանի որ Ատրպէյճանը Յունուար 9-էն ի վեր կը շարունակէ խափանած պահել Հայաստանէն Արցախ ելեկտրամատակարարումը:
Կը խնդրենք բոլորին հնարաւորինս խնայողաբար օգտագործել ելեկտրականութիւնը` խուսափելու համար ցանցի յաւելեալ ծանրաբեռնուածութենէն ու վթարներէն: Իսկ ինքնաշարժի կազի կայարաններու աշխատակիցներուն ու ինքնաշարժի վարորդներուն կը յորդորենք հետեւիլ անվտանգութեան ու ճանապարհափոխադրութեան երթեւեկութեան բոլոր կանոններուն` խուսափելու համար պատահարներէն ու աւելորդ հերթերէն՚:
