Յուլիս 1-ին Քորնէթ Սաուտայի մէջ տեղի ունեցած ծանօթ միջադէպը կը շարունակէ մնալ ապահովական, քաղաքական եւ կրօնական լուսարձակներու տակ:
Լիբանանեան բանակի հրամանատարութիւնը յայտարարեց, որ արիւնալի միջադէպէն ետք հետախուզական ծառայութիւնը կատարած է շարք մը խուզարկումներ, որոնց ընթացքին ձերբակալած է հրաձգութեան փոխանակումին մասնակցած քանի մը անձեր: Ըստ հաղորդագրութեան, նախնական հարցաքննութենէ ետք ազատ արձակուած է ձերբակալուածներուն մէկ մասը, իսկ 11 հոգի կալանաւորուած է եւ փոխանցուած դատական առնչացկից մարմիններունª հետաքննութիւնը շարունակելու համար: Կը կարծուի, որ նշեալ 11 կալանաւորուածներու շարքին են Հայսամ Թոքի սպանութեան մասնակիցները:
Մարոնիներու պատրիարք Պըշարա Ռահի կարտինալը յանձնառութիւն յայտնեց դատական մարմիններու վճիռներուն եւ ահազանգեց, որ վարչական եւ դատական նախկին որոշումները չեն գործադրուած քաղաքական ծանօթ միջամտութիւններու պատճառով: Իսկ Յոյն ուղղափառներու Պէյրութի առաջնորդ Էլիաս Աուտի եպիսկոպոսը հարց տուաւ, թէ պետական առնչակից մարմինները ինչու չեն սահմանագծեր գաւառներու եւ բնակավայրերու կալուածները, որպէսզի ամէն մարդ իմանայ իր սահմանը եւ ապրի խաղաղ:
