Լիբանանեան բանակի հրամանատարութիւնը հաղորդագրութեամբ մը նշեց, որ Լիբանանէն ապօրինի գաղթականներ մաքսանենգող ցանցերու հետապնդումի ծիրին մէջ, հետախուզական ծառայութեան կատարած խուզարկումներուն ընթացքին հիւսիսային Աքքար գաւառի Պըպնին գիւղէն ձերբակալուած է 7 քաղաքային, որոնցմէ գրաւուած է զէնք ու զինամթերք: Ձերբակալուած անձերն ու նիւթերը յանձնուած են դատական պատկան մարմիններուն:
Նշենք, որ Ներքին ապահովութեան ուժերու ընդհանուր տնօրէնութիւնը նախապէս յայտարարած էր, որ Տեղեկահաւաքի բաժանմունքի երկու գործողութեան ընթացքին բացայայտուած են հարիւրաւոր անձեր, որոնք կը պատրաստուէին նաւակներով ապօրինի ուղեւորութիւն կատարել դէպի Իտալիա: Գործողութիւններուն ընթացքին, հիւսիսային Մընիէ եւ Մըհամմարա շրջաններուն մէջ ձերբակալուած են քանի մը անձեր, որոնք կը պատրաստուէին կազմակերպել աւելի քան 231 լիբանանցիի եւ սուրիացիի ապօրինի ուղեւորութիւնը: Ապահովութեան ուժերու յայտարարութիւնը նշեց, որ տեղի ունեցածը մարդասիրական միջամտութիւն էր, որովհետեւ նշեալ հարիւրաւոր ուղեւորներուն կը սպասէր վտանգաւոր եւ անորոշ ճակատագիր:
