Պաշտօնական այցով Լեհաստան գտնուող ՀՀ ԱԺ նախագահ Ալէն Սիմոնեանի գլխաւորած պատուիրակութիւնը հանդիպած է Վարշավայի Քազիմիր Փուլասքի անվտանգութեան գիտահետազօտական կեդրոն-հիմնադրամի փորձագէտներուն:
Հանդիպման ընթացքին ՀՀ ԱԺ նախագահը հակիրճ անդրադարձած է Հայաստանի մէջ իրականացուող ժողովրդավարական բարեփոխումներու օրակարգինª շեշտելով, որ շարք մը միջազգային հեղինակաւոր կազմակերպութիւններու զեկոյցներուն մէջ Հայաստանի ժողովրդավարական ձեռքբերումներու վերաբերեալ փաստերը խօսուն են:
Ան ներկաներուն յիշեցուցած է, որ Հայաստանը կը շարունակէ անցնիլ մեծ դժուարութիւններու միջովª բախելով անվտանգութեան սպառնալիքներուն: Այս ծիրին մէջ հայ պատուիրակները մանրամասնած են Հայաստանի հանդէպ ատրպէյճանական շարունակուող յարձակման հետեւանքներըª շեշտելով, որ Ատրպէյճանը կոպտօրէն կը խախտէ միջազգային իրաւունքի սկզբունքները եւ կը սպառնայ Հայաստանի տարածքային ամբողջականութեան: ՙԱտրպէյճանը, կոպտօրէն խախտելով 2020 թուականի Նոյեմբեր 9-ի եռակողմ յայտարարութեան դրոյթները, անցեալ տարուան Դեկտեմբերէն արգելափակած է Լաչինի միջանցքը, որ յանգեցուցած է ծանր մարդասիրական ճգնաժամի: Լեռնային Ղարաբաղի 120.000 հայ կ՛ապրին լիակատար պաշարման պայմաններու մէջ՚, նշած է ՀՀ ԱԺ նախագահը:
Պատասխանելով տարածաշրջանին մէջ տեւական խաղաղութիւն հաստատելու վերաբերեալ փորձագէտներու հարցումներունª Ալէն Սիմոնյանը բարձր գնահատած է արեւմտեան գործընկերներու (ԱՄՆ, ԵՄ, Ֆրանսա, Գերմանիա) ջանքերը Հարաւային Կովկասի մէջ խաղաղութեան, կայունութեան եւ անվտանգութեան հաստատման գործընթացին մէջ:
Լեհ գործընկերները նշած են, որ հակամարտող երկիրներու համար ամենաբարդը կողմերը բաւարարող վերջնական լուծում գտնելն է, սակայն անկէ ավելի բարդ է իրավիճակը առանց լուծման թողելը, ինչ որ կրնայ յանգեցնել անդառնալի հետեւանքներու:
ՀՀ ԱԺ նախագահը հաւաստիացուցած է, որ Հայաստանը իր հարեւաններէն տարածքային պահանջներ չունի եւ պիտի շարունակէ ընել հնարաւորը տարածաշրջանի անվտանգութեան եւ խաղաղութեան համար: Հանդիպման ընթացքին բարձրաձայնուած է նաեւ այն, որ Ատրպէյճանը մշտապէս կը մերժէ խաղաղութեան ուղղուած բոլոր ջանքերը, կ՛անտեսէ Մարդու իրաւունքներու եւրոպական դատարանին որոշումները եւ Արդարադատութեան միջազգային դատարանին պարտադիր որոշումըª իրականացնելով Լեռնային Ղարաբաղի մէջ ցեղային զտումներու բացայայտ քաղաքականութիւն:
Եզրափակելով հանդիպումըª ՀՀ ԱԺ խօսնակը հաւաստիացուցած է, որ մեր երկրին մէջ իսկապէս կը հաւատան, որ ժողովրդավարութիւնը, օրէնքի գերակայութիւնը, մարդու իրաւունքները խաղաղ գոյակցութեան երաշխիքներ են:
