Երեւանի մէջ կայացած են քաղաքական խորհրդակցութիւններ Հայաստանի եւ Հնդկաստանի հանրապետութիւններու արտաքին գործերու նախարարութիւններուն միջեւ:
Խորհրդակցություններու ծիրին մէջ, ՀՀ արտաքին գործերու նախարարի տեղակալ Մնացական Սաֆարեան ընդունած է Հնդկաստանի Արտաքին գործերու նախարարութեան արտաքին քաղաքականութեան ծրագրաւորման վարչութեան պետ Սումիթ Սեթի գլխաւորած պատուիրակութիւնը:
Քաղաքական խորհրդակցութիւններու ընթացքին կողմերը քննարկած են Հայաստանի եւ Հնդկաստանի արտաքին քաղաքականութեան առաջնահերթութիւններն ու գերակայ խնդիրները, երկուստեք անդրադարձ կատարուած է Հայաստանի եւ Հնդկաստանի արտաքին գերատեսչութիւններու կազմին մէջ գործող քաղաքականութեան մշակման եւ ծրագրաւորման վարչութիւններու հիմնական գործառոյթներուն:
Կողմերը ընդգծած են երկկողմ բարեկամական յարաբերութիւններու աճող աշխուժութիւնը, քննարկած հայ-հնդկական բարձր մակարդակի շփումներու, միջգերատեսչական կապերու աշխուժացման եւ քաղաքական երկխօսութեան օրակարգի կարեւորութիւնը: Կողմերը պատրաստակամութիւն յայտնած են յաւելեալ ջանքեր ներդնելու պետութիւններու միջեւ յարաբերութիւններու աւելի խորացման ուղղութեամբ:
Անդրադարձ կատարուած է միջազգային եւ տարածաշրջանային անվտանգութեան առնչուող հարցերու լայն շրջանակի, ինչպէս նաեւ երկկողմ տնտեսական, մշակութային, կրթական կապերու ամրապնդման, միջազգային կազմակերպութիւններուն մէջ համագործակցութեան, երկիրներու միջեւ հաղորդակցութեան կապուղիներու հաստատման խթանման:
Նախարարի տեղակալ Սաֆարեանը հնդկական կողմին ներկայացուցած է Ատրպէյճանի կողմէ վերջին շրջանին եւ առ այսօր իրականացուող յարձակողական գործողութիւնները, որոնք կը վտանգեն Հարաւային Կովկասի մէջ կայունութիւնն ու խաղաղութիւնը£ Ընդգծուած է Լաչինի միջանցքի ապօրինի շրջափակման հետեւանքով Լեռնային Ղարաբաղի մէջ ստեղծուած մարդասիրական ճգնաժամի շուտափոյթ յաղթահարման կարեւորութիւնը£
