Երեքշաբթի, 27 Յունիս 2023-ի առաւօտեան, Սոցիալ Դեմոկրատ Հնչակեան Կուսակցութեան Կեդրոնական վարչութեան ատենապետ Ընկ. Տոքթ. Համբիկ Սարաֆեանի գլխաւորած պատուիրակութիւնը տեսակցեցաւ Մեծի Տանն Կիլիկիոյ Արամ Ա. կաթողիկոսին հետ:
Պատուիրակութեան մաս կազմեցին Կեդրոնական վարչութեան անդամ ընկերներ Ալեքսան Քէօշկէրեան, Համբիկ Թաթուլեան եւ Վազգէն Համալեան, ինչպէս նաեւ ՍԴՀԿ Լիբանանի շրջանի Վարիչ մարմինի ատենապետ Ընկ. Վանիկ Տագէսեան: Տեսակցութիւնը պատեհ առիթ էր արծարծելու հայ ժողովուրդը յուզող հրատապ թղթածրարները՝ ներառեալ Հայաստանի դիմաց ցցուած վտանգաւոր մարտահրաւէրները, Արցախի արդէն աւելի քան կէս տարուան պաշարումն ու անոր հետեւանքները, Սփիւռքի գաղութներուն դիմագրաւած հարցերը: Հայ ժողովուրդին համար վտանգաւոր համարելով այս փուլը, զրուցակիցները շեշտեցին շարունակաբար խորհրդակցելով հարցերուն լուծումները գտնելու կարեւորութիւնը:
ՍԴՀԿ-ի պատուիրակութիւնը տեսակցեցաւ նաեւ ՄԱՀԱԵՄ նախագահ, Հայկազեան համալսարանի նախագահ Վեր. Դոկտ. Փօլ Հայտոսթեանի հետ, քննարկելու համար լիբանանահայ գաղութին, Հայաստանին, Արցախին եւ Սփիւռքին առչուող նիւթերը եւ փոխանակելու գաղափարներ:
