Ռուսիոյ մէջ անցնող օրերուն զինեալ ապստամբութեան դրօշը բարձրացուցած, ապա պելառուսական միջնորդութեամբ հանդարտած ՙՈւակներ՚ վարձկան զինեալներու զօրախումբի ղեկավար Եվկենի Փրիկոժին յայտնեց, թէ որոշուած էր իր զօրախումբը լուծել Յուլիս 1-ին, ուստի իրենք որոշած էին հակադարձել` արշաւելով Մոսկուա, բողոքելու համար անարդար որոշումին դէմ: 11 վայրկեան երկարող ձայնագրութեամբ մը Փրիկոժին յայտնեց, որ իրենց ապստամբութեան նպատակն էր կանխել զօրախումբի լուծումը եւ հաշուեյարդարի ենթարկել ռազմական գործողութիւններուն ընթացքին սխալներ գործած պատասխանատուները, ոչ թէ տապալել Մոսկուայի ղեկավարութիւնը: ՙՄոսկուայի ուղղութեամբ մեր արշաւը բացայայտեց ապահովական ներքին խնդիրները՚, ըսաւ Փրիկոժին, շնորհակալութիւն յայտնելով Պելառուսիոյ նախագահին` օրինական միջոցներով միջնորդելուն համար:
Նոյն ծիրին մէջ, Միացեալ նահանգներու նախագահ Ճօ Պայտըն յայտնեց, որ Ուաշինկթըն որեւէ կապ չունի Ռուսիոյ մէջ տեղի ունեցած ապստամբութեան փորձին հետ, պատահածը համարելով ռուսական վարչակարգի ներքին բախումներու մասնիկ: ՙՈւաշինկթըն պիտի շարունակէ աջակցիլ Քիեւին, ինչ որ ալ ըլլան ռուսական ներքին զարգացումները՚, ըսաւ ամերիկացի նախագահը:
