Արցախի Հանրապետութեան Ազգային ժողովի նախագահ Արթուր Թովմասեանը ողջունած է ԵԽԽՎ-ի ընդունած ՙԼաչինի միջանցքով ազատ, անվտանգ մուտքի ապահովումը՚ բանաձեւը:
ՙՈղջունելի է Եւրոպայի խորհրդի խորհրդարանական վեհաժողովին ընդունած բանաձեւը, որով Ատրպէյճանին կոչ կը կատարուի ապաշրջափակելու միջանցքը, անյապաղ կատարելու ՄԻԵԴ-ի եւ ՄԱԿ-ի բարձրագոյն դատական ատեանի` Արդարադատութեան Լահէյի միջազգային դատարանին որոշումները, վերականգնելու ելեկտրականութեան եւ կազի մատակարարումը Լեռնային Ղարաբաղ, ապահովելու բեռներու եւ մարդոց երթեւեկութիւնը Լաչինի միջանցքով` երկու ուղղութեամբ՚, ըսուած է Արցախի Ազգային ժողովի նախագահի խօսքին մէջ:
Արթուր Թովմասեանը կարեւոր կը համարէ այն հանգամանքը, որ Ատրպէյճանին հասցէական կոչ կը կատարուի հրաժարելու հայութեան դէմ կիրառուող թշնամական եւ սպառնալից հռետորաբանութենէն, Լեռնային Ղարաբաղի հայ բնակչութեան իրաւունքներուն եւ անվտանգութեան հարցերը լուծել Պաքուի եւ Ստեփանակերտի միջեւ երկխօսութեան, ինչպէս նաեւ միջազգային չէզոք ներգրաւման ապահովման միջոցով:
ՙԽաղաղութեան ուղղուած որեւէ մեխանիզմի կիրառում ընդունելի է մեր կողմէ, ողջունելի են միջազգային դիտորդական, փաստահաւաք առաքելութիւնները, որոնք լոյս կը սփռեն առկայ իրավիճակին վրայ ու կը զսպեն Ատրպէյճանի յարձակողական քաղաքականութիւնը՚, ըսած է ան:
Ազգային ժողովի նախագահը կարեւոր համարած է նաեւ Վեհաժողովին այն շեշտադրումը, որ ներկայ իրավիճակը կայուն չէ եւ կրնայ յանգեցնել հայ բնակչութեան կողմէ իր բնօրրանը լքելուն:
