Հանրապետութեան նախագահի ընտրութեան հերթական նիստին ձախողութիւնը ինչպէս միշտ դուռ բացաւ քաղաքական բանավէճերու, պատասխանատուութեան եւ ամբաստանութիւններու փոխանակումի:
Լիբանանեան ուժեր կուսակցութեան նախագահ Սամիր Ժաաժաա համացանցային գրառումներով նշեց, որ ՙեթէ ընտրական առաջին փուլէն ետք ըլլար երկրորդ մը, ապա Լիբանան արդէն նախագահ կ’ունենար՚: Ժաաժաայի համաձայն, խորհրդարանին մէջ երէկ տեղի ունեցածը միայն նիստի խոչընդոտում չէր, այլª նախագահի ընտրութեան խափանում:
Երեսփոխան Թոնի Ֆրանժիէ հակադարձեց Ժաաժաային եւ շեշտեց, որ նոյնիսկ ընտրական 10 փուլի դիմելով կարելի պիտի չըլլայ նախագահ ընտրել, ՙորովհետեւ Ժիհատ Ազհուրի թեկնածութիւնը որդեգրողները լաւ գիտեն, թէ ան յաջողութեան յոյս չունի՚: Երեսփոխանին համաձայն, Ազհուրի անունին շուրջ քաղաքական հակառակորդներու եւ հակասութիւններու համաձայնութեան նպատակն է պայքարէն դուրս մղել Սըլէյման Ֆրանժիէն:
Իսկ Փաղանգաւոր կուսակցութեան նախագահ Սամի Ժըմայէլ նշեց, որ ընտրութեան նախորդած ժամերուն եղած են ճնշումներ եւ սպառնալիքներ, որպէսզի կարգ մը երեսփոխաններ փոխեն իրենց որոշումը: Երեսփոխան Միշէլ Մուաուատ իր կարգին զարմանք յայտնեց, թէ ինչպէս նախագահական թեկնածուի մը խմբաւորումին երեսփոխանները եւ նոյնիսկ զաւակը կը հեռանան ընտրութեան նիստէն:
Ազգային ազատ հոսանքի նախագահ երեսփոխան Ժըպրան Պասիլ պնդեց, որ նախագահի ընտրութեան հարցով ՙոչ ոք կրնայ շրջանցել Լիբանանի քրիստոնեայ բաղադրիչն ու անոր որոշումը՚: Պասիլ հետեւաբար կոչ ուղղեց տապալելու նախապայմաններն ու հրաժարելու թեկնածու պարտադրելու եւ առճակատումի տեսութիւններէն: Իսկ Հըզպալլայի երեսփոխաններէն Հասան Ֆատլալլա շեշտեց, որ Ֆրանժիէ կը կրէ քաղաքական յստակ ծրագիր մը եւ կրնայ հանգստացնել լիբանանցիները, մինչ Ազհուրին զօրակցողները կը համաձայնին միայն Ֆրանժիէն տապալելու շուրջ:
