Խորհրդարանին մէջ երէկ տեղի ունեցաւ Լիբանանի հանրապետութեան նոր նախագահի ընտրութեան հերթական նիստը, որ ունենալով նախորդներուն ճակատագիրը, վերստին ցոյց տուաւ, թէ նախագահի ընտրութիւնը յաջողցնելու համար հրամայական է նախօրօք համախոհութեան բիւրեղացումը, առանց որուն ընտրական նիստերը ենթակայ կը մնան խափանումի իրարայաջորդ փորձերու:
Նոր նախագահի ընտրութեան 12-րդ նիստը եւս ունեցաւ միայն մէկ փուլ, որուն աւարտին նախկին նախարար Ժիհատ Ազհուր ստացաւ 59 քուէ, Մարատա հոսանքի նախագահ Սըլէյման Ֆրանժիէª 51, նախկին նախարար Զիատ Պարուտª 6 քուէ: ՙՆոր Լիբանանը՚ քուէաթերթիկով ընտրեց 9 երեսփոխան, մէկ հոգի սպիտակ քուէաթերթիկով մասնակցեցաւ, իսկ մէկ քուէ համարուեցաւ անվաւեր: Արդիւնքներու յայտարարութեան զուգահեռ յառաջացաւ մէկ քուէաթերթիկի ճգնաժամ, մինչ խորհրդարանի նախագահը մերժեց ընտրութիւնը կամ հաշուարկը կրկնելու առաջարկները եւ պատճառաբանեց, որ մէկ քուէաթերթիկը ոչինչ պիտի փոխէ: Շուտով դահլիճէն հեռացան Հըզպալլայի ու Ամալի երեսփոխանները եւ ուրիշներ, ուստի նիստը կորսնցուց երեսփոխաններու օրինաւոր թիւը եւ փակ յայտարարուեցաւ:
Խորհրդարանի նախագահ Նեպիհ Պըրրի նիստի խափանումէն ետք յայտարարեց, թէ նոր նախագահ կարելի չէ ընտրել առանց երկխօսութեան ու համաձայնութեան:
Ֆրանժիէ ընտրական այս նիստէն ետք շնորհակալութիւն յայտնեց Պըրրիին եւ իրեն զօրակցած բոլոր երեսփոխաններուն: ՙՆաեւ կը յարգենք ինծի չքուէարկած երեսփոխաններուն դիրքորոշումը, զայն համարելով բոլորին հետ երկխօսութիւն կատարելու եւ ազգային շահերը պահպանելու լաւ հնարաւորութիւն՚, ըսաւ ան:
