5-8 Յունիսին Մայր Աթոռ Սուրբ Էջմիածինի մէջ, նախագահութեամբ Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսին, տեղի ունեցաւ Գերագոյն հոգեւոր խորհուրդի ժողովը:
Ժողովը ատենապետեց Կ. Պոլսոյ Հայոց պատրիարք ամենապատիւ Տ. Սահակ արքեպիսկոպոս Մաշալեանը, իսկ նիստերը վարեց ԱՄՆ Հայոց Արեւմտեան թեմի առաջնորդ Տ. Յովնան արքեպիսկոպոս Տէրտէրեանը:
Հայաստանի ու Արցախի մէջ ստեղծուած կացութեան վերաբերեալ զեկոյցներով հանդէս եկան Արցախի Արտաքին գործերու նախարար Սերկէյ Ղազարեանը եւ ԳՀԽ անդամ Գէորգ Դանիէլեանը:
Զեկոյցներուն մէջ անդրադարձ կատարուեցաւ Հայաստանի եւ Արցախի շուրջ աղէտալի զարգացումներուն, մասնաւորաբար շրջափակման հետեւանքով Արցախի ժողովուրդին սպառնացող ցեղասպանութեան վտանգին եւ Հայաստանի ինքնիշխան տարածքներու նկատմամբ իրականացուող ոտնձգութիւններուն: Անհանգստութեամբ անդրադարձ եղաւ նաեւ երկրին ներսը գոյացած մարտահրաւէրներուն, հասարակական անհամերաշխութեան ու բեւեռացուածութեան:
ԳՀԽ-ն խոր մտահոգութեամբ արձանագրեց հայրենական կեանքին մէջ ստեղծուած ծանր կացութիւնը: Կարեւորեց, որ Հայաստանի իշխանութիւնները հրաժարին ազգի արժանապատուութիւնը ոտնահարող գործողութիւններէն եւ արտաքին թշնամիներու նուաստացուցիչ յաւակնութիւններուն ու պահանջներուն հակադրեն իրատեսական եւ բացառապէս հայանպաստ դիրքորոշումներ` վճռականօրէն պաշտպանելով Արցախի ժողովուրդին ինքնորոշման անսակարկելի իրաւունքը:
ԳՀԽ -ն իր զօրակցութիւնը յայտնեց Արցախի ժողովուրդին եւ իշխանութիւններուն` արձանագրելով նաեւ, որ Արցախի ժողովուրդին ազատ ու անկախ ապրելու արդար իրաւունքը պաշտպանութիւն պիտի գտնէ համազգային բոլոր շրջանակներուն մէջ: Ժողովականները ընդգծեցին, որ պէտք է ամէն ջանք ի գործ դնել ժողովուրդի միասնութեան ոգին զօրացնելու եւ համերաշխութեան մթնոլորտ ձեւաւորելու համար:
Արցախին ուղղուած ընկերային աջակցութեան վերաբերեալ զեկոյցով հանդէս եկաւ Մայր Աթոռի Ընկերային բաժնի տնօրէն Տ. Մարկոս քահանայ Մանկասարեանը: Տէր Հայրը ի մասնաւորի ընդգծեց, որ Ամենայն Հայոց Հայրապետին յորդորով ու ջանքերով, Մայր Աթոռի աշխարհասփիւռ թեմերու գործուն մասնակցութեամբ շրջափակման մէջ գտնուող Արցախին տրամադրուած է 360 թոն մարդասիրական օգնութիւն: Տրամադրուող աջակցութիւնը պիտի ըլլայ շարունակական:
Ժողովականները, մտահոգութեամբ անդրադառնալով ատրպէյճանական շրջափակման հետեւանքով շարունակուող մարդասիրական ճգնաժամային իրավիճակին, ընգդծեցին ընկերային աջակցութեան ծրագիրներու ընդլայման անհրաժեշտութիւնը:
Հանրակրթական դպրոցներուն մէջ ՙՀայոց Եկեղեցւոյ պատմութիւն՚ առարկայի դասաւանդման եւ կրթական հիմնախնդիրներու մասին զեկուցեց Եկեղեցական Հայեցակարգային բաժնի տնօրէն Տ. Վազգէն արքեպիսկոպոս Միրզախանեանը` տեղեկացնելով, որ կառավարութեան նախաձեռնութեամբ ՀՀ-ի մէջ Հանրակրթութեան պետական նոր չափորոշիչի ներդրմամբ առարկան ամբողջապէս դուրս կը բերուի կրթական ծրագրէն:
Քննարկումներու ընթացքին ԳՀԽ-ը, վերահաստատելով իր դիրքորոշումը, անթոյլատրելի համարեց առարկայի դուրս բերումը հանրակրթական ծրագրէն` ընդգծելով, որ այն կարեւոր գործօն է սերունդներու դաստիարակութեան ու կրթութեան առաքելութեան մէջ: Այս ծիրին մէջ անդրադարձ եղաւ յատկապէս անչափահասներու շրջանակին մէջ բռնութեամբ ուղեկցուող ծանր յանցագործութիւններու եւ թմրամոլութեան ահագնացող աճին: Կենսական համարուեցաւ, որ իշխանութիւնները գործնական եւ արդիւնաւէտ քայլեր իրականացնեն` պայքարելու յիշեալ երեւոյթներուն դէմ, ինչպէս եւ հասարակութեան մէջ, յատկապէս կրթական հաստատութիւններուն մէջ արժեւորելու յանուն հայրենիքի պայքարի ելած, մեր նահատակ հայորդիներուն սխրանքը, որպէսզի չտկարանայ ազգի զաւակներու հայրենանուիրումի ոգին:
Մայր Տաճարի հիմնանորոգութեան եւ ամրակայման աշխատանքներու, Միւռոն օրհնութեան եւ յարակից միջոցառումներու կազմակերպման վերաբերեալ զեկոյցներով հանդէս եկան Մայր Աթոռի դիւանապետ Տ. Արշակ արքեպիսկոպոս Խաչատրեանը եւ լուսարարապետ Տ. Մուշեղ եպիսկոպոս Բաբայեանը:
Քննարկումներու բերումով ԳՀԽ-ը, հաշուի առնելով Մայր Տաճարի հիմնանորոգման աշխատանքներու ծաւալներու ընդլայնման եւ ընթացող աշխատանքներու ժամանակատարութեան հանգամանքները, որոշեց`
– Մայր Տաճարի վերաօծման արարողութիւնը յետաձգել մինչ հիմնանորոգման աշխատանքներու ամբողջական աւարտը,
– Սրբալոյս Միւռոնի օրհնութեան արարողութիւնը կազմակերպել սոյն թուականի Հոկտեմբեր 1-ին,
– Եպիսկոպոսաց ձեռնադրութիւնը` Հոկտեմբեր 8-ին:
Ժողովին անդրադարձ եղաւ նաեւ Երուսաղէմի Հայոց Պատրիարքութեան` երկարաժամկէտ վարձակալութեան տրուած կալուածքներու խնդիրին եւ արձանագրուեցաւ, որ Մայր Աթոռ Սուրբ Էջմիածինը կապի մէջ է Պատրիարքարանին հետ եւ ի մօտոյ կը հետեւի ընթացող զարգացումներուն:
Քառօրեայ ժողովի ընթացքին քննարկուեցան նաեւ Եկեղեցւոյ Նուիրապետական Աթոռներու եւ թեմերու գործունէութեան, Եկեղեցւոյ առաքելութեան արդիւնաւորմանն առնչուող այլ հարցեր:
Ժողովը ամփոփուեցաւ Ամենայն Հայոց Հայրապետին օրհնութեան եւ գնահատանքի խօսքով:
