Փարիզի Քաղաքային խորհուրդը օրերս միաձայն ընդունած է ՙԱրցախի ժողովուրդին եւ Հայաստանի Հանրապետութեան մէջ ապաստանած արցախցիներուն հրատապ օգնութեան տրամադրման՚ վերաբերեալ բանաձեւ:
Այս մասին կը յայտնեն Ֆրանսայի մէջ Հայաստանի դեսպանութենէն:
Բանաձեւին մէջ կ՛ընդգծուի 2022 թուականի 12 Դեկտեմբերէն ի վեր Ատրպէյճանի կողմէ Լաչինի միջանցքի ապօրինի արգելափակման հետեւանքով Արցախի 120 հազար բնակիչի` մնացեալ աշխարհէն կտրուած ըլալու հանգամանքը, յղում կը կատարուի 2020 թուականի 27 Նոյեմբերին Արցախի Հանրապետութեան ճանաչման վերաբերեալ Փարիզի Քաղաքային խորհուրդին կողմէ Ֆրանսայի կառավարութեան ուղղուած կոչ-բանաձեւի ընդունման, Ֆրանսայի տարբեր վարչատարածքային միաւորներու կողմէ Արցախի բնակչութեան ցուցաբերուած օգնութեան, Փարիզի քաղաքապետարանին կողմէ հայ ժողովուրդին ուղղուած աջակցութեան եւ համերաշխութեան բազմաթիւ կոչերուն, Երեւան քաղաքի` Ֆրանքոֆոն քաղաքապետերու միջազգային միութեան (ՖՔՄՄ) անդամակցութեան, կը կարեւորուի Փարիզ քաղաքին կողմէ արցախահայութեան հերթական անգամ աջակցութեան տրամադրումը:
Քաղաքային խորհուրդը նշուած բանաձեւով նաեւ Փարիզի քաղաքապետին լիազօրութիւն կու տայ` կոչ ընելու Ֆրանսայի այլ վարչատարածքային միաւորներուն եւ ՖՔՄՄ-ի անդամ օտարերկրեայ քաղաքներուն` միանալու հրատապ աջակցութեան այդ նախաձեռնութեան, որուն նպատակն է Հայաստանի Հանրապետութեան մէջ ապաստանած արցախցիներուն աջակցիլը եւ Արցախի բնակչութեան մարդասիրական սնունդ հասցնելը:
