ՙFLYONE ARMENIA՚ օդանաւային ընկերութիւնը 6 Յունիսէն պիտի սկսի Երեւան- Թեհրան-Երեւան երթուղով թռիչքները: Թռիչքին մեկնարկը պիտի նշանաւորուի կարեւոր իրադարձութեամբ: 6 Յունիսին կը լրանայ մեծագոյն երաժշտահաններէն մէկուն` Արամ Խաչատրեանի 120-ամեակը եւ օդանաւային ընկերութիւնը որոշած է օդանաւերէն մէկը անուանակոչել Արամ Խաչատրեանի անունով: Այս մասին նշեց ՙFLYONE ARMENIA՚ ընկերութեան խորհուրդի նախագահ Արամ Անանեանը:
ՙՄենք կապի մէջ ենք երաժշտահանի ընտանիքին հետ, ունինք համաձայնութիւն: Կը կարծեմ, որ Արամ Խաչատրեանի անունը կրող օդանաւին ճախրանքը հայ մշակոյթը աշխարհին տեսանելի պիտի դարձնէ: Որպէս օդանաւային ընկերութիւն մենք ուշադրութիւն կը դարձնենք մեր արժէքներու քարոզին՚, ըսաւ Արամ Անանեան:
Դէպի Թեհրան կը նախատեսուի իրականացնել շաբաթական չորս թռիչք` իւրաքանչիւր Երկուշաբթի, Երեքշաբթի, Չորեքշաբթի եւ Ուրբաթ:
