ՙFLYONE ARMENIA՚ օդանաւային ընկերութիւնը կ՛ընդլայնէ թռիչքներու աշխարհագրութիւնը` աւելցնելով նոր ուղղութիւններ: Այս մասին նշեց ՙFLYONE ARMENIA՚ ընկերութեան խորհուրդի նախագահ Արամ Անանեանը:
ՙՅառաջիկային պիտի մեկնարկենք կանոնաւոր թռիչքներ դէպի Պարսելոնա, Թիւաթ, Պուրկաս: Թռիչքներու աւելացում կայ նաեւ դէպի Մոսկուա ուղղութեամբ, մասնաւորապէս, Շերեմեթեւօ օդակայան: Այդպիսով` Մոսկուայի 4 օդակայններէն երեքին մէջ պիտի ունենանք թռիչքներ՚, ըսաւ Արամ Անանեան:
ՙFLYONE ARMENIA՚ ընկերութիւնը կ՛իրականացնէ երկու տասնեակէ աւելի ուղղութիւններով թռիչքներ` Ռուսիա, Եւրոպա, Մերձաւոր Արեւելք:
Արամ Անանեանի խօսքով` վերջին շրջանին չուացուցակի բոլոր խնդիրները կը յաղթահարուին: ՙFLYONE ARMENIA՚-ի մօտ առկայ է չուացուցակի` 90 տոկոսէ աւելի համապատասխանեցում: Թէ՛ ուղեւորներուն անվտանգութիւնը, թէ՛ անվտանգ օդային փոխադրումը, թէ՛ չուացուցակին համապատասխանելը օդանաւային ընկերութեան առաջնահերթ հարցերն են: Արամ Անանեան նշեց, որ ամէն ինչ կը կատարուի այդ ուղղութեամբ ցուցանիշերը բարելաւելու համար: Օդանաւային ընկերութեան կառավարման համակարգին մէջ ներգրաւուած են նոր մասնագէտներ:
ՙՇուրջ 8 օդանաւ թռիչքներ կ՛իրականացնէ ՙFLYONE ARMENIA՚ ընկերութեան համար: Լրջագոյն հեռանկարներ կը տեսնենք օդային փոխադրումներու զարգացման համար: Որպէս ընկերութիւն մենք նկատելի ներդրում բերած ենք այդ հարցին մէջ: Ըսեմ, որ վերջին շրջանին նկատելի անկում կայ տոմսերու գիներու առումով: Օդային փոխադրումները կը դառնան շատ աւելի հասանելի ու մատչելի, եւ մենք չենք կրնար մեր դերը այստեղ չտեսնել՚, ըսաւ Արամ Անանեան:
Օդանաւային ընկերութիւնը նաեւ իր գործունէութեամբ կը նպաստէ Երեւանի տարանցիկ հարթակ ըլլալու դերի բարձրացման: ՙFLYONE ARMENIA՚-ի թռիչքները հնարաւորութիւն կու տան այլ ընկերութիւններուն Հայաստան տեղափոխել ուղեւորներ, որոնք իրենց ուղեւորութիւնը կը շարունակեն ՙFLYONE ARMENIA՚-ի հետ:
ՙFLYONE ARMENIA՚-ն իր թռիչքային ծրագիրը ամբողջութեամբ կ՛իրականացնէ: Խօսելով Թուրքիոյ կողմէ օդային տարանցման արգելանքի մասին, որ կիրառուեցաւ հայաստանեան բոլոր օդանաւային ընկերութիւններուն նկատմամբ, Արամ Անանեան նշեց, որ եւրոպական գործընկեր ընկերութիւններու օդային փոխադրութեան գործիքակազմի կիրառմամբ կրցած են ընել այնպէս, որ բոլոր ուղեւորները հասնին իրենց նշանակման վայրերը:
