Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսը Մայր Աթոռ Սուրբ Էջմիածինի մէջ ընդունեց Արժանթինի խորհրդարանի Արժանթին-Հայաստան բարեկամական խումբի նախագահ Կիերմօ Անտրատայի գլխաւորած պատուիրակութիւնը` ուղեկցութեամբ Հայաստան-Արժանթին բարեկամական խումբի ղեկավար Իշխան Սաղաթէլեանի:
Հանդիպման ներկայ էին նաեւ Հայաստանի մէջ Արժանթինի արտակարգ եւ լիազօր դեսպան Մարիանօ Վերկարան եւ Արժանթինի մէջ ՀՀ արտակարգ եւ լիազօր դեսպան Յովհաննէս Վիրապեանը:
Ամենայն Հայոց կաթողիկոսը, անդրադառնալով երկու երկիրներու յարաբերութիւններուն, ընդգծեց, որ անոնք յատկանշուած են սերտ բարեկամութեամբ եւ Արժանթինը դժուարին իրավիճակներու մէջ, յատկապէս արցախեան 44-օրեայ պատերազմի ընթացքին մշտապէս զօրակից եղած է հայ ժողովուրդին: Այս առնչութեամբ Վեհափառ Հայրապետը գնահատանքով անդրադարձաւ Արժանթինի ծերակոյտին կողմէ Լաչինի միջանցքի արգելափակումը դատապարտող եւ դադրեցնելու կոչ ընող յայտարարութեան:
Հանդիպման ընթացքին Նորին Սրբութիւն անդրադարձ կատարեց տարածաշրջանին մէջ առկայ մարտահրաւէրներուն, Հայաստանի սահմաններուն նկատմամբ ոտնձգութիւններուն, Արցախի մէջ ստեղծուած մարդասիրական ճգնաժամին, մինչեւ օրս գերութեան մէջ պահուող հայորդիներուն, ինչպէս նաեւ Ատրպէյճանի վերահսկողութեան տակ յայտնուած տարածքներուն մէջ հայկական հոգեւոր, մշակութային ժառանգութեան պահպանման խնդիրներուն:
Ամենայն Հայոց Հայրապետը ողջունեց բարեկամ երկիրներուն, խորհրդարանական եւ պետական գործիչներուն ու անհատներուն ջանքերը ուղղուած միջազգային ատեաններուն մէջ արցախահայութեան ազատ եւ անկախ ապրելու արդար իրաւունքի պաշտպանութեան` վստահութիւն յայտնելով, որ հայ ժողովուրդը քրիստոնէական հաւատքի եւ լաւատեսական ոգիին շնորհիւ պիտի կարենայ յաղթահարել առկայ դժուարութիւններն ու մարտահրաւէրները:
Արժանթին-Հայաստան բարեկամական խումբի նախագահ Կիերմօ Անտրատան Նորին Սրբութեան տեղեկացուց, որ իրենց այցին նպատակն է նաեւ անմիջականօրէն ծանօթանալ Հայաստանի եւ Արցախի մէջ տիրող իրավիճակին` հաւաստիացնելով, որ իրենց լիազօրութիւններու շրջանակներուն մէջ պիտի նպաստեն տարածաշրջանին մէջ խաղաղութեան եւ կայունութեան հաստատման գործընթացներուն:
Զրոյցի ընթացքին անդրադարձ կատարուեցաւ նաեւ Քոյր Եկեղեցիներու եւ միջեկեղեցական կազմակերպութիւններու ներդրած ջանքերունª Լեռնային Ղարաբաղի հակամարտութեան խաղաղ կարգաւորման եւ առկայ մարտահրաւէրներու յաղթահարման գործին մէջ:
