ՙ
Այո՛, կը յառնինք մոխիրէն, կը ճախրենք հողմերուն դէմ, կը խոյանանք ամպերէն վեր..: Մեր սլացքը անխոնջ է եւ մեր կամքըª աննկուն: Այս նշանաբանովª Լիբանանի Նոր Սերունդ Մշակութային Միութեան ՙԱրեգ՚ պարախումբը հանդէս եկաւ հանրութեան եւ մատուցեց յաջորդական երեք փայլուն ելոյթներ:
Ի հեճուկս Լիբանանի մէջ տիրող քաղաքական ու տնտեսական սուր տագնապին եւ օրըստօրէ ծաւալող անյուսադրելի պայմաններուն, Նոր Սերունդ Մշակութային Միութիւնը փաստեց իր եզակի կարողութիւնըª յաղթահարելու երկրին անբարենպաստ պայմանները, տիրող հոգեվիճակը…: Հետեւաբար անոր անձնակազմը անսակարկ ջանքերով կարելի դարձուց անկարելին եւ երկար դադարէ մը ետք ՙԱրեգը՚ կրկին բեմ բարձրացուց: ՙԱրեգ՚ը շողաց, փայլատակեց, ջերմացուց եւ խանդավառեց իր յարգելի հանդիսատեսները:
Թէեւ ես Լիբանանէն մղոններ հեռու եմ, բայց կ?ապրիմ Լիբանանով…: Հոգիս կը թնդայ երբ Լիբանանի մէջ որեւէ ընկերային եւ մշակութային նախաձեռնութիւն կ?իրագործուի: Շնորհիւ սիրելի բարեկամներուս եւ ընկերային ցանցերու հասանելիութեան, ստացայ ՙԱրեգ՚ համոյթին տեսերիզները, որոնք դիտեցի ՙականատեսի՚ յափշտակութեամբ… մերթ զարմանքով, մերթ հիացմունքով եւ մերթ հրճուանքով: Հրամցուած պարերը ակնառու եւ յատկանշուող էին իրենց գեղարուեստական բնոյթով, բարձրորակ կատարողութեամբ, այլազանութեամբ, տարազներու ճոխութեամբ… ամբողջացնելով բեմահարթակին բոլոր պահանջները եւ իրաւունքները:
Իրաւացի է այն արտայայտութիւնը, որ կ’ըսէ. ՙԱմուրը կը գոյատեւէ՚: Ես ճանչցած եմ Նոր Սերունդ Մշակութային Միութիւնը ութսունականներու սկիզբը եւ մաս կազմած եմ իր վարչական կազմին£ Եթէ յետադարձ ակնարկ մը նետեմ անոր անցեալի նուաճումներուն եւ այսօրուան իրագործումին, կրնամ հաստատել, որ ա՛յս միութիւնը ընդմիշտ պիտի գոյատեւէª հեզասահօրէն նաւարկելով ժամանակի յորձանուտներուն դէմ եւ ընդմիշտ յառնելով մոխրամած փիւնիկի պէս:
Մեծապէս կը գնահատեմ բոլոր անոնք, որ սատարեցին այս պարային համոյթին յաջողութեան: Յարատեւ վերելք կը մաղթեմ սիրելի եւ պանծալի Նոր Սերունդ Մշակութային Միութեան:
ՍԻԼՎԱ ԻՍԿԻԿԵԱՆ ՄԱՀՍԵՐԵՃԵԱՆ
