Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսը Մայր Աթոռ Սուրբ Էջմիածնի մէջ ընդունեց Հայոց Եկեղեցւոյ պատմութիւն (ՀԵՊ) առարկայի հանրապետական մրցոյթին մրցանակային տեղեր զբաղեցուցած աշակերտները:
Հանդիպման սկիզբը Մայր Աթոռի Քրիստոնէական դաստիարակութեան կեդրոնի տնօրէն հոգեշնորհ Տ. Զաքարիա ծայրագոյն վարդապետ Բաղումեանը, հայցելով Նորին Սրբութեան օրհնութիւնը, ներկայացուց այս տարուան ՀԵՊ առարկայի մրցոյթի արդիւնքներն ու արձանագրած յաջողութիւնները` շեշտելով առարկային սիրուած ըլլալն ու կարեւոր դերակատարութիւնը մատաղ սերունդի ազգային-հոգեւոր կրթութեան եւ դաստիարակութեան գործին մէջ:
Այնուհետեւ Ամենայն Հայոց կաթողիկոսը, Իր սէրն ու օրհնութիւնը փոխանցելով ներկաներուն, շնորհաւորեց մրցոյթի մրցանակակիրները` ուրախութեամբ արձանագրելով, որ առարկան կարեւոր ձեռքբերում է նորանկախ հանրապետութեան կրթութեան ոլորտին մէջ:
Նորին Սրբութիւնը ցաւով նկատեց, որ կրթական չափորոշիչներու փոփոխութեամբ դպրոցներուն մէջ պիտի դադրի առարկայի դասաւանդումը` յոյս յայտնելով, որ ՀՀ իշխանութիւնները անդրադարձ կ’ունենան այդ որոշման ու մեր զաւակներուն հնարաւորութիւն կ’ընձեռուի ստանալ հոգեւոր գիտելիքներ եւ դաստիարակութիւն` հաւատարիմ մնալու նախնեաց ժառանգութեան ու ազգային արժեհամակարգին:
Հայոց Հովուապետը աշակերտներուն յորդորեց ջերմեռանդութեամբ եւ նախանձախնդրօրէն շարունակեն իրենց ուսումնառութիւնը, ամբարեն նոր գիտելիքներ եւ եկեղեցասիրութեամբ ու հայրենաճանաչութեամբ իրենց մէջ զօրացնեն նուիրումի ոգին` ի փառս հայրենիքի եւ Մայր Եկեղեցւոյ:
Հանդիպման ընթացքին Վեհափառ Հայրապետը նաեւ իր գնահատանքը փոխանցեց Հայր Զաքարիային եւ ՀԵՊ ուսուցիչներուն` պատանի հայորդիները տարիներ շարունակ քրիստոնէական եւ ազգային արժեհամակարգով կրթելու եւ դաստիարակելու իրենց կատարած նուիրեալ աշխատանքին համար` ընդգծելով, որ անոր վառ վկայութիւնը աշակերտներուն արձանագրած յաջողութիւններն են:
Աւարտին, Ամենայն Հայոց կաթողիկոսը պատասխանեց աշակերտները հետաքրքրող հարցումներուն:
