Եւրոպական միութեան Արտաքին քաղաքականութեան յանձնակատար Ժոզէփ Պորէլ յայտարարեց, թէ քննելէ ետք թրքական խորհրդարանական եւ նախագահական ընտրութեան եւրոպացի դիտորդներու տեղեկագիրը, իրենք կոչ կ’ուղղեն պետութեան նկատի առնելու կարգ մը բացթողումներ: Ան կոչ ուղղեց կատարելու թափանցիկ ընտրութիւն, հաւասար առիթի հիման վրայ: Ըստ Թուրքիոյ Կեդրոնական ընտրական յանձնաժողովին, երկրին մէջ ընտրութեան մասնակցեցան ընտրողներուն 88,92 առ հարիւրը, իսկ արտերկրի մէջª ընտրողներուն 52,69 առ հարիւրը:
Միւս կողմէ, բրիտանական ՙԿարտիըն՚ օրաթերթը հրապարակեց վերլուծում մը Թուրքիոյ նախագահական ընտրութեան մասին: Յօդուածին մէջ հրապարակագիրը յայտարարեց, թէ 2018 թուականէն ի վեր Էրտողան կը կառավարէ միապետական ձեւով: Այս անգամ ընդդիմութիւնը կրցաւ միացեալ ճակատ մը կազմել անոր դէմ: Խորհրդարանի ընտրութեան Էրտողանի վարած ճակատին յաղթանակը մեծ հարուած է երկրին վերադարձնելու իր դեմոկրատական իշխանութեան ձեւը, ըստ յօդուածագիրին: Էրտողանի նախագահ վերընտրութիւնը յօդուածագիրը անընդունելի համարեց Եւրոպայի եւ ԱՄՆ-ի համար, մանաւանդ Ուքրանիոյ մէջ պատերազմի շարունակութեան հեռանկարին մէջ: Էրտողանի յաղթանակին պարագային, երկիրը աւելի պիտի մխրճուի միապետական համակարգի մը մէջ: Ընդդիմութեան գործը բաւական դժուար է, նկատի ունենալով որ գրեթէ ամբողջ լրատուական միջոցները կը գտնուին Էրտողանի համակիր մարդոց հակակշիռին տակ:
