Ռուսիոյ Դաշնութեան Անվտանգութեան խորհուրդի փոխնախագահ Տմիթրի Մետվետեւ, պատասխանելով Ֆրանսայի նախագահ Մաքրոնի այն յայտարարութեան, թէ Ռուսիա պարտուեցաւ աշխարհաքաղաքականութեան մարզին մէջ եւ ան դարձաւ Չինաստանի լծորդ, յայտարարեց, թէ կ’երեւի Ֆրանսայի նախագահը ազդուած է զիրենք այցելող Ուքրանիոյ թմրամոլ նախագահէն: Մետվետեւ, շարունակելով իր յայտարարութիւնը, բուռն յարձակում գործեց Լեհաստանի եւ նախկին Խորհրդային միութեան անդամ Պալթիք ծովու երեք հանրապետութիւններուն վրայ: Ան աւելցուց, որ իր վարած հակառուս քաղաքականութեամբ Եւրոպա դարձաւ լծորդ ամերիկեան քաղաքականութեան, վնասելով ինքնիրեն:
Միւս կողմէ, ռուսական ՙԹԱՍՍ՚ լրատու գործակալութիւնը հաղորդեց, թէ ձերբակալուած են երեք ռուս գիտնականներª հրապարակելու համար կազերու տինամիքայի մասին ռուս գիտնականներու թեզերը: Վերջինը Վալերի Զվիկինցեւն է, որ գիտական յօդուած մը հրապարակած է իրանեան գիտական պարբերաթերթի մը մէջ: Ռուսիա երեք գիտնականները դրած է կալանքի տակ, դաւաճանութեան ամբաստանութեամբ: Ռուսիոյ Դաշնութիւնը շատ զգայուն է գիտական փորձերու մասին, որոնք ռուս գիտնականներու տասնեակ տարիներու աշխատանքի արդիւնքն են ու կը վախնայ անոնց Արեւմուտքի կողմէ իւրացումէն, մանաւանդ հակամարտութեան այս օրերուն:
