Հայաստանի Հանրապետութեան նախագահ Վահագն Խաչատուրեանին իր հաւատարմագրերը յանձնած է Հայաստանի մէջ Հունգարիոյ արտակարգ եւ լիազօր դեսպան Աննա Մարիա Շիքօն (նստավայրը` Թիֆլիս):
Վահագն Խաչատուրեանը շնորհաւորած է Աննա Մարիա Շիքօն` դիւանագիտական յարաբերութիւններու երկարատեւ դադարէ յետոյ Հայաստանի մէջ Հունգարիոյ դեսպանի պաշտօնում նշանակուելու առնչութեամբ:
ՙՄենք մեծապէս կը կարեւորենք Ձեր նշանակումը: Հայաստանը եւ Հունգարիան` որպէս դարաւոր բարեկամ երկիրներ, պիտի շարունակեն իրենց համագործակցութիւնը, եւ ամէն ինչ պիտի ընենք, որպէսզի մեր երկկողմ յարաբերութիւնները իսկապէս զարգացում ունենան: Վստահ եմ, որ Ձեր անձնական ներդրումը պիտի ունենաք մեր յարաբերութիւններու զարգացման գործին մէջ՚, ըսած է նախագահը:
Դեսպան Աննա Մարիա Շիքօն, շնորհակալութիւն յայտնելով ընդունելութեան համար, նշած է.
ՙՄենք բաւական երկար սպասած ենք այս պահին, եւ այսօր ունինք արդիւնք: Մենք քրտնաջան աշխատեցանք, առաջին հերթին կը փափաքիմ շնորհակալութիւն յայտնել Հունգարիոյ եւ Հայաստանի մէջ աշխատող բոլոր անոնց, որոնքր այս ամէնը հնարաւոր դարձուցին՚:
Հանդիպման ընթացքին անդրադարձ կատարուած է Հայաստանի եւ Հունգարիոյ միջեւ տնտեսական փոխգործակցութեան հեռանկարներուն եւ առկայ ներուժի լիարժէք իրականացման: Երկուստեք կարեւորուած է կրթութեան, զբօսաշրջութեան եւ մշակոյթի ոլորտներուն մէջ համագործակցութեան խթանումն ու համատեղ ծրագիրներու իրականացումը:
Զրոյցի ընթացքին ընդգծուած է միջազգային կազմակերպութիւններուն, մասնաւորապէս` Եւրոմիութեան հարթակին մէջ, աշխոյժ համագործակցութեան եւ ժողովրդավարական հիմնարկներու կայացման նպատակով լաւագոյն փորձի փոխանակման կարեւորութիւնը:
