Հաղպատի աշտարակը, որ վնասուած էր վերջին տարիներու երկրաշարժերէն, ինչի պատճառով ալ այն 14 Մայիս 2023-ին փլուզուած էր, ամբողջութեամբ պիտի վերականգնուի:
Այս մասին ըսաւ ՀՀ Կրթութեան, գիտութեան, մշակոյթի եւ մարմնակրթութեան նախարարութեան Պատմութեան եւ մշակոյթի յուշարձաններու պահպանութեան վարչութեան պետ Յարութիւն Վանեանը:
Անոր խօսքով` Հաղպատի մէջ պարբերաբար ամրակայման եւ վերականգնման աշխատանքներ իրականացուած են, սակայն վերջին քանի մը տարիներուն` ոչ:
ՙՀաղպատի աշտարակը վնասուած էր վերջին երկրաշարժերէն: Մարզային աշխատակիցները խնդիրը ճշդած էին մօտ երկու տարի առաջ ու ահազանգած, որմէ յետոյ մենք գացինք Հաղպատ: Դեռ նախորդ տարուան իմ այցէն յետոյ նախարարութիւնը յայտարարած էր ամրակայման եւ նորոգման նախագիծի մասին, որովհետեւ ակնյայտ էր, որ փլուզման վտանգ կայ: Նախագիծը ընդունուած է Գիտամեթոտական խորհուրդին կողմէ: Վերականգնման մրցոյթը յայտարարման փուլին է, եւ յառաջիկայ օրերուն պիտի յայտարարուի: Մասնակից ըլլալու պարագային այս տարի փլուզուած աշտարակը եւ պարիսպին տուեալ հատուածը ամբողջութեամբ պիտի վերականգնուին՚, նշեց Վանեան:
Անոր խօսքով` աշտարակին բոլոր քարերը տեղն են, եւ այն հնարաւոր է վերականգնել առանց կորուստներու:
ՙՈչ միայն աշտարակին, այլեւ ճակատային պարիսպին հատուածը ամբողջութեամբ մինչեւ միւս աշտարակը նախագիծին մէջ ներառուած են՚, շեշտեց Յարութիւն Վանեանը:
Անդրադառնալով պատմամշակութային յուշարձաններու տարածքին կազմակերպուող ապօրինի թաղումներուն եւ այլ խախտումներուն` ան ըսաւ, որ խախտումներ պարբերաբար կ՛ըլլան: Իրենք համապաստախան ու համարժէք աշխատանք կը տանին այդ ուղղութեամբ:
