ՀՀ վարչապետ Նիկոլ Փաշինեան յայտնած է, որ աւելի քան 53 անձ, այդ շարքին` բարձրաստիճան սպաներ, կ՛անցնին պետական դաւաճանութեան քրէական գործերով:
Վարչապետը այս մասին ըսաւ Ազգային ժողովին մէջ ՙՀայաստանի Հանրապետութեան կառավարութեան ծրագրի (2021-2026 թթ.) 2022 թուականի կատարման ընթացքի եւ արդիւնքներու մասին՚ զեկոյցի քննարկման ընթացքին` անդրադառնալով ՙՔաղաքացիական Պայմանագիր՚ խմբակցութեան պատգամաւոր Սոնա Ղազարեանի հարցումին:
Անդրադառնալով պատգամաւորին` ՙ5-րդ շարասիւպ՚ի վերաբերեալ հարցումին` Փաշինեան յայտնեց. ՙԱյս պահի դրութեամբ աւելի քան 53 անձ` մեծ մասը զինուորականներ, սպաներ, բարձրաստիճան սպաներ պետական դաւաճանութեան գործերով կ՛անցնին: Ին՞չ է պետական դաւաճանութիւնը: Այն է, որ մարդիկ իրենց դիրքերուն տեղերը գումարի դիմաց փոխանցած են հակառակորդին՚:
Նիկոլ Փաշինեան նշեց, որ պատերազմի ժամանակ իր ազգականներէն մէկը եկած է իր աշխատասենեակ ու ըսած, որ բարձրաստիճան սպաներէն մէկը զօրքին մէջ խուճապ կը տարածէ` ըսելով, որ վարչապետը ՙհողերը տուած է, անիմաստ է կռուիլը՚:
ՙՎերջերս ալ լրիւ պատահաբար կ՛իմանամ, որ ինչ-որ առիթով քրէական գործ յարուցուած է, ու այդ դրուագը հիմնաւորուելու շատ մեծ հնարաւորութիւն ունի՚, նշեց ան:
Այս իրավիճակով պայմանաւորուած` վարչապետին խօսքով` դատաիրաւական համակարգին մէջ գործընթացները դանդաղ, բայց ընթացքի մէջ են:
ՙՄեր նպատակը իրօք անկախ դատական համակարգ ունենալն է: Ասոր մէջ բացարձակ ձեւ, կեղծաւորութիւն չկայ: Իմ գնահատականս այն է, որ մենք կը շարժինք դէպի այդ, ընդ որում` ցաւոտ կերպով, որովհետեւ շատ պարագաներու հանրութիւնն ալ մեզ չի հասկնար, կ՛ըսէ` փոխանակ թոշակ բարձրացնենք, դատաւորին աշխատավա՞րձը կը բարձրացնէք՚: Բայց իմ համոզմունքս եղած է ու կը շարունակէ մնալ հետեւեալը` մենք դատաւորներուն, իրաւապահ համակարգին աշխատավարձը կը բարձրացնենք առաջին հերթին յանուն քաղաքացիներուն՚, ըսաւ վարչապետը:
Փաշինեան նաեւ վստահեցուց, որ անկեղծ կերպով կը շարունակեն պայքարը փտածութեան դէմ:
