Հայաստանի Հանրապետութեան վարչապետ Նիկոլ Փաշինեան ընդունած է ԱՄՆ պետական քարտուղարի փոխտեղակալ Էրիքա Օլսոնը:
Վարչապետը կարեւորած է ԱՄՆ-ի հետ սերտ համագործակցութեան հետեւողական զարգացումը եւ հայ-ամերիկեան ռազմավարական երկխօսութեան օրակարգի շարունակական յառաջմղումը: Նիկոլ Փաշինեան բարձր գնահատած է ԱՄՆ վարչակազմին օժանդակութիւնը Հայաստանի մէջ ժողովրդավարական բարեփոխումներու իրականացման գործին մէջ եւ յաւելած, որ այդ օրակարգին իրացումը ՀՀ կառավարութեան համար ռազմավարութիւն է ու առաջնահերթութիւն: Միաժամանակ, վարչապետը կարեւորած է ԱՄՆ ջանքերը` տարածաշրջանին մէջ կայունութեան եւ խաղաղութեան հաստատման նպատակով:
Իր հերթին, Էրիքա Օլսոնը նշած է, որ ԱՄՆ պիտի շարունակէ արդիւնաւէտ համագործակցութիւնը Հայաստանի մէջ ժողովրդավարական բարեփոխումներու արդիւնաւէտ կեանքի կոչման ուղղութեամբ եւ նշած, որ իր երկրի նկառավարութիւնը մեծապէս կը կարեւորէ ՀՀ-ի հետ յարաբերութիւններու շարունակական զարգացումը, ընդ որում` տնտեսութեան ոլորտին մէջ:
Զրուցակիցները քննարկած են Լեռնային Ղարաբաղի հակամարտութեան, Ստեփանակերտի եւ Պաքուի միջեւ երկխօսութեան միջազգային մեխանիզմի ձեւաւորման, Ատրպէյճանի կողմէ Լաչինի միջանցքի ապօրինի շրջափակման հետեւանքով ԼՂ-ի մէջ ստեղծուած մարդասիրական ճգնաժամին, Հայաստանի եւ Ատրպէյճանի միջեւ յարաբերութիւններու կարգաւորման, տարածաշրջանային ճանապարհային ենթակառուցուածքներու ապաշրջափակման վերաբերող հարցեր:
