Ատրպէյճանի նախագահ Իլհամ Ալիեւ կը շարունակէ սպառնալ Հայաստանին: Ան հաստատեց, որ բանակաշինութեան հոլովոյթը տակաւին կը շարունակուի: Ալիեւ վստահեցուցած է, որ Ատրպէյճանի այսօրուան բանակը աւելի զօրաւոր է 2020-ին յաղթանակ տարած բանակէն: Ան կոչ ուղղեց միշտ պատրատ ըլլալու կացութեան որեւէ փոփոխութեան:
Իսրայէլի արտաքին գործերու նախարար Էլի Քոհէն պիտի մեկնի Ատրպէյճան: Այդ այցելութեան նպատակն է Ատրպէյճանի հետ միացեալ ճակատի մը հաստատումը: Այդ ճակատը պիտի ընդգրկէ ռազմավարական, տնտեսական, ապահովական, ուժանիւթի եւ նորարարութեան մարզերու մէջ համագործակցութիւն: Այս այցելութեան ընթացքին, նախարարին պիտի ընկերակցին 20 մեծ ընկերութիւններու տնօրէններ ուժանիւթի, գիտութեան, ապահովութեան եւ գիւղատնտեսութեան մարզերուն մէջ:
