Ապրիլ 2-ին Հայաստանեայց Առաքելական Սուրբ Եկեղեցին տօնախմբեց մեր Տէր Յիսուս Քրիստոսի Երուսաղէմ յաղթական մուտքի յիշատակը` Ծաղկազարդը: Տօնը տարիներ առաջ Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսի օրհնութեամբ հռչակուած էր մանուկներու օրհնութեան օր:
Այս առիթով, Առաւօտեան ժամերգութենէն յետոյ, հանդիսապետութեամբ Ամենայն Հայոց կաթողիկոսին, Միածնաէջ Սուրբ Տաճարի շրջափակին մէջ տեղի ունեցաւ Անդաստանի արարողութիւն եւ մանուկներու օրհնութեան կարգ: Նորին Սրբութիւնը իր օրհնութիւնը բաշխեց Մայր Աթոռին մէջ համախմբուած մանուկներուն եւ ուխաւորներուն:
Բերկրաշատ տօնին առիթով Մայր Աթոռ Սուրբ Էջմիածնի միաբանութիւնը Պատարագի սրբազան արարողութեան մասնակցեցաւ Սուրբ Գայիանէ վանքին մէջ: Պատարագիչն էր Մայր Աթոռ Սուրբ Էջմիածնի Վանորէից տեսուչ գերաշնորհ Տ. Արտակ եպիսկոպոս Տիգրանեանը:
Արտակ Սրբազանը իր քարոզին մէջ անդրադարձ կատարեց Մեծ Պահքի կիրակիներու խորհուրդին` ի մասնաւորի ընդգծելով, որ Բուն Բարեկենդանէն մինչեւ Ծաղկազարդ ինկած ժամանակահատուածը հրաշալի հնարաւորութիւն է ներհայեցողաբար քննելու մեր սրտերը եւ հաւատքի մէջ աւելի զօրացած սկսելու Աւագ Շաբաթը:
Այնուհետեւ անդրադառնալով օրուան խորհուրդին` պատարագիչ Սրբազանը նշեց. ՙԾաղկազարդին Երուսաղէմի ժողովուրդը քաղաքական առումով բաժնուած էր քանի մը խումբերու, սակայն Մեսիայի գաղափարը Երուսաղէմի բնակիչներուն անհատական եւ համընդհանուր շահերը զետեղած էր մէկ տեղի մէջ: Փարիսեցիներն ու սադուկեցիները, մաքսաւորներն ու զելոտները մէկ կողմ դրած էին քաղաքական եւ վարդապետական տարաձայնութիւնները եւ եկած էին գտնելու իրենց թէ՛ անհատական եւ թէ՛ միասնական փրկութիւնը՚:
Աւարտին, Արտակ Սրբազանը ներկայ հաւատացեալներուն յորդորեց` չնմանիլ Երուսաղէմի այն օրերուն մարդոց, որոնք իրենց հագուստները եւ ճիւղերը տարածեցին Տիրոջ առջեւ, սակայն օրեր յետոյ խաչեցին, այլ պատասխանատուութեամբ վերցնենք մեր խաչը եւ ինքնաքննութեամբ անցնինք Գողգոթայի ճանապարհը:
Սուրբ Պատարագի աւարտին, Ամենայն Հայոց Հայրապետին նախագահութեամբ, վերստին կատարուեցաւ մանուկներու օրհնութեան կարգ:
Նոյն օրը, տօնին առիթով, Գարեգին Բ. Ամենայն Հայոց կաթողիկոսը ընդունեց ու իր հայրապետական օրհնութիւնը բաշխեց հայաստանեան տարբեր թեմերու եկեղեցիներուն մէջ սպասաւորող դպիր մանուկներուն եւ երգչախումբերու պատանի երգչուհիներուն:
