ԳԱՐՆԱՆԱՅԻՆ ՀԱՆԴԻՊՈՒՄ
Գարունը կը բնորոշուի իր գեղեցկութեամբ, գոյներով եւ բոյրերով: Գարնան առաջին օրը նաեւ նուիրուած է աշխարհի բոլոր մայրերուն:
Ինչպէս գիտենք, գեղեցկութիւնն ու քնքշութիւնը, ինչպէս նաեւ անկեղծ սէրն ու նուիրումը մօր մը գլխաւոր յատկանիշերն են: Հետեւաբար, գարնան առաջին օրը իր ամբողջական գեղեցկութեամբ, ծաղիկներու անուշ բոյրերով մեզի կը յիշեցնեն ՄԱՅՐԸ:
Հետեւաբար, այս գեղեցիկ տօնին ու անոր կցելով ուսուցչաց տօնը, ՍԴՀԿ ՙՄարօ Նազարբէկեան՚ մասնաճիւղը գեղեցիկ միտք մը յղացած էր մեծարելու իր անդամուհիները, ինչպէս նաեւ գնահատելու ուսուցչական ասպարէզէն ներս վաստակ վայելող բոլոր ուսուցչուհիները:
Արդարեւ, Երեքշաբթի, 21 Մարտ 2023-ի երեկոյեան, ՀԿԲՄ-ի դարմանատան սրահին մէջ, հրաւիրուած էին մասնաճիւղի ընկերուհիները մտերմիկ հանդիպմամբ մը միասնաբար տօնելու զոյգ առիթները:
Ընկ.հի Անի Եփրեմեան բարի գալուստ մաղթելէ ետք, անդրադարձաւ օրուան իմաստին եւ պատգամին, եւ նշեց մասնաւորապէս հայ մօր դերը, որ բոլորովին կը տարբերի աշխարհի մնացեալ մայրերէն: Ան ըսաւ, որ նաեւ հակառակ լիբանանեան ամէն տեսակի դժուարութիւններուն, հայ կինը կը շարունակէ եւ պիտի շարունակէ կանգնիլ պատնէշի վրայ, մնալով միշտ իր ընտանիքին եւ ազգին կողքին:
Ուսուցիչներուն յատուկ բարի գալուստ մաղթելէ ետք ան նշեց, որ անոնց ասպարէզը այս օրերուն կը պարտադրէ ահագին սէր եւ համբերութիւն, մաղթելով բոլորին քաջառողջութիւն եւ ամենայն բարիք:
Իւրաքանչիւր ուսուցչուհի շնորհակալութիւն յայտնեց մասնաճիւղի այս գեղեցիկ մտայղացումին համար, եւ իր կրթական ասպարէզէն ներս հետաքրքրական դրուագներ պատմեց ներկաներուն:
Ուրախ եւ խանդավառ մթնոլորտի մէջ, Ուսուցչաց տօնին առթիւ պատրաստուած կարկանդակը հատեցին ուսուցչուհիները երգերով եւ ծափերով:
Կը շնորհաւորենք բոլոր մայրերն ու ուսուցչուհիները, որոնք իսկապէս երկրորդ ծնողք են այս աշխարհի վրայ:
Վարձքը կատար բոլորին:
