Արցախի Հանրապետութեան Արտաքին գործերու նախարարութիւնը յայտարարութիւն կատարած է, ուր ան կը յայտնէ, թէ արդէն 100 օրէ ի վեր Ատրպէյճան շրջապատուած կը պահէ Արցախը, նպատակադրելով պարպել այդ հողամասը իր բնիկ բնակչութենէն: Անոր նպատակն է ուժով լուծել Արցախի ինքնորոշման իրաւունքը: Նոյն ատեն անոնք կը մերժեն որեւէ բանակցութիւն կատարել Արցախի բնակչութեան ներկայացուցիչներուն հետ:
Ատրպէյճան 1988 թուականէն ի վեր կը վարէ հակահայ քաղաքականութիւն: Կազմակերպած է ջարդեր Ատրպէյճանի հողին վրայ, վտարելով հայ քաղաքացիները ու ջարդած է զանոնք: Տարիներու ընթացքին, Ատրպէյճան միշտ փորձած է ուժի միջոցով լուծել Արցախի հարցը: 2020 թուականի պատերազմին որպէս արդիւնք, Արցախի 40 հազար բնակիչ ենթարկուած են տեղահանութեան: Ատրպէյճանի իշխանութիւնները չեն պահեր իրենց հակահայ քաղաքականութիւնը, այլ կը վարեն այդ քաղաքականութիւնը բացէ ի բաց:
