Արցախի Հանրապետութեան Արտաքին գործերու նախարարութիւնը մեկնաբանած է Մարտ 1-ին Արցախի մէջ Ռուսիոյ Դաշնութեան խաղաղապահ զօրակազմի հրամանատարին միջնորդութեամբ Արցախի Հանրապետութեան եւ Ատրպէյճանի Հանրապետութեան ներկայացուցիչներուն միջեւ կայացած հերթական հանդիպումը` նշելով որ անյետաձգելի հարցերու լուծման, մասնաւորապէս, Արցախի ապաշրջափակման նպատակով կազմակերպուող նմանատիպ քննարկումները չեն կրնար փոխարինել լիարժէք խաղաղ բանակցութիւնները, որոնք անհրաժեշտ են ատրպէյճանա-ղարաբաղեան հակամարտութեան համապարփակ կարգաւորման համար:
Արցախի Արտաքին գործերու նախարարութեան մեկնաբանութեան մէջ նշուած է. ՙՀանդիպման ընթացքին քննարկուած են մարդասիրական բնոյթի հարցեր` Ատրպէյճանի կողմէ Լաչինի միջանցքի անյապաղ բացման անհրաժեշտութեան ծիրին մէջ: Ռուսիոյ խաղաղապահ զօրակազմի միջնորդութեամբ Արցախի եւ Ատրպէյճանի ներկայացուցիչներուն միջեւ տարբեր մակարդակով նման հանդիպումներ կայացած են բազմիցս` տեխնիկական, մարդասիրական եւ ենթակառուցուածքային հարցերու քննարկման նպատակով:
Արցախի Հանրապետութեան քաղաքական կարգավիճակին վերաբերող հարցեր հանդիպման մասնակիցները չեն քննարկած: Հանդիպման բերումով ատրպէյճանական կողմին կատարած մեկնաբանութիւնները իրականութեան չեն համապատասխաներ: Արցախի Հանրապետութիւնը կը պահպանէ յանձնառութիւնը իր ժողովուրդին` ինքնորոշման եւ անկախութեան ուղիի ընտրութեան, որն ամրագրուած է 1991 թուականի հանրաքուէի ժամանակ:
Անյետաձգելի հարցերու լուծման, մասնաւորապէս, Արցախի ապաշրջափակման նպատակով կազմակերպուող նմանատիպ քննարկումները չեն կրնար փոխարինել լիարժէք խաղաղ բանակցութիւնները, որոնք անհրաժեշտ են ատրպէյճանա-ղարաբաղեան հակամարտութեան համապարփակ կարգաւորման համար: Կ՛ելլենք միջազգային միջնորդական ձեւաչափի վերականգնման անհրաժեշտութենէն` որպէս խաղաղ գործընթացի անշրջելիութեան կարեւոր երաշխիք: Կրկին կ՛ընդգծենք, որ Արցախի Հանրապետութեան դիրքորոշումը առ այն, որ Ատրպէյճանի կողմէ ուժի եւ ուժի սպառնալիքի ապօրինի կիրառման արդիւնքները չեն կարող մեկնակէտ ըլլալ խաղաղութեան, կայունութեան եւ անվտանգութեան հաստատման ճանապարհին, կը մնայ անփոփոխ՚:
