Փտածութեան դէմ պայքարը Հայաստանի համար սկզբունքային նշանակութիւն ունեցող հարց է, չի կրնար ըլլալ փտածութեան որեւէ դէպք, որուն քննութիւնը պատշաճ ընթացք չստանայ:
Այս մասին վստահեցուց ՀՀ վարչապետ Նիկոլ Փաշինեանª ըսելով. ՙՓտածութեան դէմ պայքարը Հայաստանի համար սկզբունքային նշանակութիւն ունեցող հարց է: Եւ մենք այս պայքարին մէջ որեւէ կերպ մեր ջանքերը պիտի չթուլացնենք՚, ըսաւ Փաշինեան:
Ինչ կը վերաբերի ընդդիմութեան կողմէ հրապարակած փաստերուն, որոնք կը վերաբերին փտածութեան դրսեւորումներուն` վարչապետը վստահեցուց, որ այդ փաստերով եւս կը հետաքրքրուին իրաւապահ մարմինները:
ՙՊէտք է վստահեցնեմ, որ չի կրնար ըլլալ փտածութեան որեւէ դէպք, որուն քննութիւնը պատշաճ ընթացք չստանայ: Բացառուած է, որ ըլլայ որեւէ փտածութեան դէպք ու այդ դէպքը պատշաճ մակարդակով քննութեան չառնուի՚, ըսաւ Փաշինեան:
Վարչապետը նկատեց, որ փտածութիւնը, առաջին հերթին, կը կապուի պետական կառավարման, տեղական ինքնակառավարման մարմիններու, դատական եւ այլ համակարգերու հետ: Վարչապետ ընդգծեց, որ իր դիրքորոշումը կը շարունակէ մնալ շատ յստակ` հանրային կառավարման ոլորտին մէջ, դատական համակարգին մէջ պէտք է աշխատավարձերու էական բարձրացում տեղի ունենայ:
ՙՉի կրնար ըլլալլ, որ մենք մէկ կողմէ ըսենք` եկէք պայքարինք փտածութեան դէմ, ըսենք որ պետական մարմինները թող որակեալ ծառայութիւններ մատուցեն ու ըսենք որ, օրինակ, նախարարութիւններուն մէջ պէտք է ըլլայ 90 կամ 110 հազար դրամով աշխատող մասնագէտ: Միւս կողմէ ալ ակնկալենք, որ գործերը արագ ու լաւ որակով ընթանան: Այս առումով մենք 2018 թուականին ընդունուած հակափտածութեան ռազմավարութիւն իրականացուցած ենք ու հիմա նոր ռազմավարութեան մշակման փուլին մէջ կը գտնուինք՚, ըսաւ Փաշինեան:
Վարչապետին համոզմամբ` ամենամեծ խնդիրը քրէական մտածողութիւնն է, փտածութեան, յանցաւորութեան համար քրէական մտածողութենէն աւելի պարարտ հող ուղղակի չկայ: ՙՄենք քրէական մտածելակերպէն պէտք է անցում կատարենք օրէնքի վրայ հիմնուած յարաբերութիւններ՚, եզրափակեց վարչապետը:
