ՙԱ.Փ.՚ լրատու գործակալութիւնը յայտարարեց, թէ Նոր Տելհիի մէջ տեղի ունեցող 20 զարգացած երկիրներու համագումարի ծիրին մէջ կարճ ժողով մը գումարուած է Ռուսիոյ Դաշնութեան արտաքին գործերու նախարար Սերկէյ Լավրովի եւ իր ամերիկացի գործընկեր Անթոնի Պլինքընի միջեւ: Այս առաջին ժողովն էր Ուքրանիոյ մէջ պատերազմը սկսելէն ի վեր:
Ժողովի ընթացքին, Պլինքըն հաստատած է, որ Միացեալ Նահանգներ պիտի օժանդակէ Ուքրանիոյ մինչեւ պատերազմին աւարտը: Ան նաեւ Ռուսիայէն պահանջած է վերադառնալ հիւլէական սահմանափակումի ՙՍԹԱՐԹ 3՚ համաձայնագիրին եւ ազատ արձակել բանտարկուած ամերիկացի Փօլ Ուիլընը: Պլինքըն արտայայտած է ԱՄՆ-ի պատրաստակամութիւնը` համագործակցելու Ռուսիոյ հետ հիւլէական զէնքի սահմանափակումի հարցին մէջ, այն մակարդակով որ գոյութիւն ունէր Պաղ պատերազմի ժամանակաշրջանին:
